-
Kiko Ta Nifiká Ser Neutral?Bo Por Disfrutá di Bida pa Semper!—Kurso di Beibel Interaktivo
-
-
LÈS 45
Kiko Ta Nifiká Ser Neutral?
Hesus a bisa ku su disipelnan “no ta parti di mundu.” (Huan 15:19) Esei ta enserá ku nan ta neutral, esta, ku nan no ta tuma parti den asuntu polítiko ni ta partisipá den guera. Sinembargo, e realidat ta ku no ta semper fásil pa keda neutral. Hende por hasi chèrchi di nos debí ku nos ta neutral. Kon nos por keda neutral i keda leal na Yehova Dios?
1. Kon kristian berdadero ta mira gobièrnu humano?
Kristian berdadero ta respetá gobièrnu humano. Nos ta obedesé Hesus i ta “duna Sésar loke ta di Sésar.” Esei ta enserá ku nos ta obedesé e leinan kaminda nos ta biba, manera e leinan ku ta eksigí pa nos paga belasting. (Marko 12:17) Beibel ta mustra ku Yehova ta esun ku ta permití gobièrnu humano goberná. (Romanonan 13:1) Esei ta laga nos komprondé ku e outoridat ku gobièrnu humano tin ta limitá, esta, nan tin ménos outoridat ku Dios. Pues, nos ta pone nos konfiansa den Dios i su Reino den shelu pa solushoná e problemanan di humanidat.
2. Kon nos por mustra ku nos ta neutral?
Meskos ku Hesus, nos no ta mete den asuntu polítiko. Ora hende den tempu di Hesus a mira Hesus hasi milager, nan a purba di hasié rei riba tera, pero e no a laga nan hasi esei. (Huan 6:15) Dikon nò? Wèl, mas despues Hesus a bisa: “Mi reino no ta parti di e mundu akí.” (Huan 18:36) Komo siguidó di Hesus, nos ta mustra ku nos ta neutral na vários manera. Por ehèmpel, nos no ta partisipá den guera. (Lesa Mikéas 4:3.) Nos ta mustra rèspèt pa símbolo nashonal, manera bandera, pero nos no ta duna nan onor ya ku esei lo ta un akto di adorashon. (1 Huan 5:21) Ademas, nos no ta apoyá ni bai kontra niun partido polítiko òf hende ku ta riba lista di partido polítiko. Esaki ta djis algun manera ku nos por demostrá ku nos ta leal na Dios su gobernashon òf Reino.
KIKO MAS NOS POR SIÑA?
Laga nos analisá algun situashon den kua por ta difísil pa nos keda neutral, i wak kon bo por tuma desishon ku ta hasi Yehova kontentu.
3. Kristian berdadero ta keda neutral
Hesus i su siguidónan semper a keda neutral. Nan a pone bon ehèmpel pa nos. Lesa Romanonan 13:1, 5-7 i 1 Pedro 2:13, 14. Despues, pasa e VIDIO i analisá e siguiente preguntanan:
Dikon nos tin ku respetá outoridat?
Kon ta algun manera ku nos por mustra ku nos ta sumiso na outoridat?
Den tempu di guera, aunke algun nashon ta bisa ku nan ta neutral, tòg nan ta apoyá tur dos banda. Kiko realmente ta nifiká keda neutral? Lesa Huan 17:16. Despues, pasa e VIDIO i analisá e siguiente pregunta:
Kiko ta nifiká ser neutral?
Kiko nos mester hasi si outoridat pidi nos hasi algu ku ta bai kontra lei di Dios? Lesa Echonan 5:28, 29. Despues, pasa e VIDIO i analisá e siguiente preguntanan:
Si nos tin ku skohe entre obedesé lei di Dios i obedesé lei di hende, ken nos tin ku obedesé?
Bo por menshoná algun situashon den kua un kristian lo no obedesé gobièrnu humano?
4. Keda neutral den loke bo ta pensa i hasi
Lesa 1 Huan 5:21. Despues, pasa e VIDIO i analisá e siguiente preguntanan:
Dikon Ayenge no a apoyá e partido polítiko di su pais ni no a partisipá den seremonia patriótiko manera saludamentu di bandera?
Bo ta haña ku loke el a skohe pa hasi tabata sabí?
Den ki otro situashon por ta difísil pa nos keda neutral? Pasa e VIDIO. Despues, analisá e siguiente preguntanan:
Kon nos por keda neutral ora nos ta wak deporte kaminda tin atleta di diferente pais ta kompetí kontra otro?
Kon nos por keda neutral ora gobièrnu tuma desishon ku ta kumbiní nos òf tuma desishon ku no ta kumbiní nos?
Kon loke nos ta tende na notisia òf di hende rònt di nos por influensiá nos desishon pa keda neutral?
Den ki área di bida un kristian mester keda neutral den loke e ta pensa i hasi?
SI UN HENDE PUNTRA: “Dikon bo no ta saludá bandera òf kanta himno?”
Kon lo bo kontestá?
RESÚMEN
Un kristian ta hasi esfuerso pa ora ta trata di asuntu polítiko e keda neutral den loke e ta pensa, papia i hasi.
Repaso
Kiko nos mester duna gobièrnu humano?
Dikon nos ta keda neutral den asuntu polítiko?
Den ki situashon por ta difísil pa nos keda neutral?
MAS INFORMASHON INTERESANTE
Kiko ta algun sakrifisio ku kisas nos lo tin ku hasi pa keda neutral?
Kon un famia por prepará di antemano pa keda neutral den situashon ku por pone nan neutralidat na prueba?
Dikon defendé bo pais no ta e onor di mas grandi ku un hende por tin den su bida?
Kon nos por demostrá ku nos no ta parti di mundu ora di tuma desishon relashoná ku trabou?
“Kada Un Lo Karga Su Mes Karga” (E Toren di Vigilansia di 15 di mart 2006)
-
-
Bo Por Keda Fiel na Yehova Apesar di PersekushonBo Por Disfrutá di Bida pa Semper!—Kurso di Beibel Interaktivo
-
-
Tardi òf trempan, nos tur lo haña nos ku oposishon. Anto hende lo por bai asina leu di persiguí nos. Esei mester spanta nos?
1. Dikon nos por spera ku hende lo persiguí nos?
Beibel ta bisa bon kla: “Tur hende ku ta deseá di biba ku deboshon na Dios komo disipel di Kristu Hesus tambe lo ser persiguí.” (2 Timoteo 3:12) Hende a persiguí Hesus pasobra e no tabata parti di e mundu di Satanas. Nos tampoko no ta parti di mundu; p’esei, no ta sorprendé nos ku gobièrnu i organisashon religioso di e mundu akí ta persiguí nos.—Huan 15:18, 19.
2. Kon nos por prepará nos mes pa enfrentá persekushon?
Ta importante pa nos fortalesé nos konfiansa den Yehova for di awor. Tuma tempu tur dia pa hasi orashon i pa lesa Beibel. Asistí regularmente na reunion. Tur e kosnan akí lo duna bo forsa i kurashi pa enfrentá kualke persekushon, asta si ta bo famia ta persiguí bo. Apòstel Pablo, kende a ser persiguí hopi biaha, a skirbi: “Yehova ta mi ayudante; lo mi no tin miedu.”—Hebreonan 13:6.
Un manera mas ku nos por haña kurashi pa enfrentá persekushon ta di prediká regularmente. Ora nos ta prediká, nos ta siña konfia den Yehova i vense miedu di hende. (Proverbionan 29:25) Si nos kultivá kurashi pa prediká for di awor, esei lo yuda nos pa sigui prediká asta ora gobièrnu prohibí nos trabou.—1 Tesalonisensenan 2:2.
3. Ora nos ta keda fiel na Yehova apesar di persekushon, kon esei ta benefisiá nos?
Naturalmente, no ta dushi ora hende ta persiguí nos. Pero ora nos ta perseverá apesar di persekushon, nos fe ta bira mas fuerte. Ademas, ora nos ta sinti ku nos no tin forsa mas pa sigui, Yehova ta yuda nos i esei ta hala nos mas serka dje. (Lesa Santiago 1:2-4.) Yehova ta bira tristu ora e mira nos ta sufri, pero e ta keda kontentu ora e mira ku nos ta perseverá. Beibel ta bisa: “Si boso ta soportá sufrimentu pasobra boso a hasi bon, esaki ta algu ku ta agradá Dios.” (1 Pedro 2:20) Si nos keda fiel na Yehova, lo e rekompensá nos ku bida eterno den e mundu nobo. E tempu ei, nos tur lo sirbi Yehova i niun hende lo no stroba nos di hasi esei.—Mateo 24:13.
KIKO MAS NOS POR SIÑA?
Laga nos wak dikon bo por tin e siguransa ku bo por keda fiel na Yehova apesar di persekushon i ku lo e rekompensá bo.
4. Bo por keda leal apesar di oposishon di famia
Hesus tabata sa ku algun di nos famianan lo no keda kontentu ku nos ta sirbi Yehova. Lesa Mateo 10:34-36. Despues, analisá e siguiente pregunta:
Ora un hende kuminsá sirbi Yehova, kiko su famianan por bisa òf hasi?
Pa wak un ehèmpel di esaki, pasa e VIDIO. Despues, analisá e siguiente pregunta:
Kiko lo bo hasi si un amigu òf famia purba di stòp bo di sirbi Yehova?
Lesa Salmo 27:10 i Marko 10:29, 30. Despues di lesa kada teksto, analisá e siguiente pregunta:
Kon e promesa ku e teksto akí ta menshoná por yuda bo ora un famia òf amigu ke purba di stòp bo di sirbi Yehova?
5. Sigui sirbi Yehova apesar di persekushon
Nos mester tin kurashi pa sigui sirbi Yehova ora otro hende ke purba di stòp nos di hasi esei. Pasa e VIDIO. Despues, analisá e siguiente pregunta:
Kon ehèmpel di e rumannan den e vidio ta fortalesé bo?
Lesa Echonan 5:27-29 i Hebreonan 10:24, 25. Despues di lesa kada teksto, analisá e siguiente pregunta:
Dikon ta masha importante pa nos sigui sirbi Yehova asta si gobièrnu prohibí nos di reuní huntu i di prediká?
6. Yehova lo yuda bo perseverá
Testigunan di Yehova di diferente edat i di rònt mundu ta sigui sirbi Yehova lealmente asta ora nan ta ser persiguí. Pasa e VIDIO pa wak kiko a yuda nan hasi esaki. Despues, analisá e siguiente pregunta:
Kiko a yuda e Testigunan den e vidio pa perseverá?
Lesa Romanonan 8:35, 37-39 i Filipensenan 4:13. Despues di lesa kada teksto, analisá e siguiente pregunta:
Kon e teksto akí ta sigurá bo ku bo por perseverá bou di kualke prueba?
Lesa Mateo 5:10-12. Despues, analisá e siguiente pregunta:
Dikon bo por ta felis asta ora bo haña bo ku persekushon?
Miónes di sirbidó di Yehova ta sigui sirbié fielmente apesar di persekushon. Abo tambe por hasi meskos!
LOKE HENDE SA BISA: “Ami sí lo no por soportá persekushon.”
Ki teksto por yuda un hende ku ta pensa asina sintié sigur ku e por keda leal apesar di persekushon?
RESÚMEN
Yehova ta keda kontentu ku nos esfuerso pa sirbié apesar di persekushon. Ku su yudansa, nos por perseverá!
Repaso
Dikon un kristian por spera di hañ’é ku persekushon?
Kiko bo por hasi for di awor pa bo por enfrentá persekushon?
Dikon bo por tin sigur ku bo por sirbi Yehova apesar di kualke prueba?
MAS INFORMASHON INTERESANTE
Wak kon un ruman hòmber hóben ta splika kon Yehova a yud’é perseverá tempu ku el a ser enkarselá pa motibu ku el a keda neutral.
Wak kiko a yuda un pareha kasá sirbi Yehova fielmente pa hopi aña apesar di persekushon.
Wak kon bo por demostrá kurashi ora bo haña bo ku persekushon.
“Prepará Awor pa Persekushon” (E Toren di Vigilansia di yüli 2019)
Kon nos mester mira oposishon di nos famia? Kiko nos por hasi pa keda na pas ku nos famia i na mes momento keda fiel na Yehova?
“E Bèrdat No Ta Trese ‘Pas, Sino Spada’” (E Toren di Vigilansia di òktober 2017)
-