Omayeletumbulo
29 Omunhu oo a kukutika ofingo* yaye, konima eshi a pukululwa lwoikando,
Ota ka teyauka ombadilila noita ka veluka vali.
2 Ngeenge ovayuki ovahapu, ovanhu ohava kala va hafa,
Ndele ngeenge omukolokoshi ota pangele, ovanhu ohava kala tava keme.
3 Omunhu oo e hole ounongo oha hafifa xe,
Ndele omunhu oo ha endafana neembwada oha hanauna po emona laye.
4 Ohamba oyo tai pangele pauyuki otai pameke oshilongo,
Ndele omunhu oo ta kongo ombubo ote shi hanauna po.
5 Omunhu oo ta mbweenga mukwao,
Okwa fa ta tele omwiyo peemhadi daye mwene.
6 Omunhu oo ha longo owii ota ka yulwa ketauluko laye mwene,
Ndele omuyuki ota ka hafa pombada nokunyakukwa.
7 Omuyuki oku na ko nasha noufemba wopaveta weehepele,
Ndele omukolokoshi ke na ko nasha.
8 Ovalitangi ova fa ovanhu ovo tava tomeke odoolopa omundilo,
Ndele ovanaendunge ohava loteke ehandu.
9 Ngeenge omunaendunge ta tu eemhata nelai, itashi eta ouwa washa,
Otapa ka kala ashike ehandu nomasheko.
10 Ovo ve hole okutilashi ohonde ove tonde keshe oo ehe na etimba,*
Nohava kala va hala okudipaa ovayuki.*
12 Ngeenge omupangeli okwa pwilikine koipupulu,
Ovapiya vaye aveshe otava ka ninga ovakolokoshi.
13 Ohepele naao ha fininike vamwe ova faafana* moshinima eshi:
Aveshe Jehova okwe va pa omesho haa mono ko.*
14 Ngeenge ohamba oya tokola ohepele pauyuki,
Olukalwapangelo layo otali kala alushe la amenwa.
15 Oshimwati* nepukululo otai yandje ounongo,
Ndele okaana inaka pewa outekuduliko otaka fifa ina ohoni.
16 Ngeenge ovakolokoshi tava hapupala, omatauluko otaa hapupala,
Ndele ovayuki otava ka mona, eshi tava hanauka po.
17 Yandja outekuduliko komona woye, note ke ku etela etulumuko;
Ote ke ku* etela ehafo linene.
18 Apa pehe na emoniko,* ovanhu itava pukululwa,
Ndele ovo hava diinine omhango otava kala va hafa.
19 Omupiya ita efa a pukululwe neendjovo,
Molwaashi nonande oku udite ko, iha dulika.
20 Owa mona tuu omunhu ha popi eendjovo inadi diladilwa?
Onakwiiwa yelai oiwa i dule yaye.
21 Ngeenge omupiya okwa tekulwa ondebula okudja kounyasha waye,
Ita ka kala e na olupandu monakwiiwa.
22 Omunhu oo ha handuka diva oha etifa okuhaudafana;
Nakeshe oo ha fulu onya oha nyono luhapu.
23 Elinenepeko lomunhu otali ke mu lininipikifa,
Ndele oo e na omhepo yelininipiko ota ka fimanekwa.
24 Kaume kombudi ote litondo.*
Ota ka pulwa a ka yandje oumbangi,* ndele ita ka popya sha.
26 Vahapu ohava kongo epopilo* komupangeli,
Ndele Jehova oye ta dulu oku va yukifila oinima.
27 Omuyuki oku tonde omunhu oo ehe fi omuyuki,
Ndele omukolokoshi oku tonde omunhu, oo ha ende mondjila ya yuka.