Ngeenge omafimbo amwe ohatu kala tu udite kutya katu na oshilonga, natu dimbuluke kutya Jehova oye mwene e tu nanena kuye. (Joh. 6:44) Oha mono omaukwatya etu mawa oo ihatu dulu okumona fye vene noku shii osho shi li momitima detu. (2 Omaf. 6:30) Onghee ohatu dulu okukala twe mu lineekela, eshi a ti kutya otu na ongushu momesho aye. (1 Joh. 3:​19, 20) Fimbo inatu shiiva oshili, vamwe vomufye otashi dulika twa ninga oinima oyo hatu livele ombedi fiyo okunena. (1 Pet. 4:3) Nokuli nOvakriste ovadiinini ohava kondjifa eamo loulunde. Mbela omutima woye ohau ku tokola? Ngeenge osho, otashi ku hekeleke okushiiva kutya ovapiya vaJehova ovadiinini navo ova kondja nomaliudo a tya ngaho. Pashihopaenenwa, omuyapostoli Paulus okwa li ha kala a nyemata, ngeenge ta diladila kokuhawanenena kwaye. (Rom. 7:24) Oshoshili kutya Paulus okwa li e lidilulula nokwa ninginifwa. Ashike okwa li e litala ko e “dulike kovayapostoli aveshe” noku li omulunde “a shiya ko.” — 1 Kor. 15:9; 1 Tim. 1:15. w24.03 27 ¶5-6

Oshilihongomwa shimwe osho hatu dulu okulihonga ketokolo lihe li pandunge lohamba Joas oshosho kutya otwa pumbwa okuhoolola ookaume ovo tave tu nwefa mo nawa, ovo ve hole Jehova nova hala oku mu hafifa. Inatu pumbwa okukala ashike hatu endafana naavo vepupi letu. Dimbuluka kutya Joas okwa li omunyasha kokule kukaume kaye Jehoiada. Shi na sha nehoololo loye lookaume, lipula kutya: ‘Mbela ohava kwafele nge ngoo ndi pameke eitavelo lange muJehova? Mbela ohava tu nge omukumo ndi kale metwokumwe nomifikamhango daKalunga? Ohava popi ngoo kombinga yaJehova nosho yo oshili yaye ya denga mbada? Mbela ohava ulike ngoo kutya ova fimaneka omifikamhango daKalunga? Mbela ohava lombwele nge ashike osho nda hala okuuda, ile ove na ngoo ouladi wokupukulula nge, ngeenge handi i pomunghulo?’ (Omayel. 27:​5, 6, 17) Ngeenge ookaume koye kave hole Jehova, va efa po. Ashike ngeenge ou na ookaume ovo ve hole Jehova, ino va efa po, otave ke ku kwafela alushe. — Omayel. 13:20. w23.09 9-10 ¶6-7

Alfa ondada yotete yoalfabeta yOshigreka naomega ondada yaxuuninwa. Eshi a ti kutya “Aame Alfa naOmega,” Jehova ote tu kwafele tu ude ko kutya, ngeenge okwa hovele oshinima shonhumba oku na oku shi wanifa. Konima eshi Jehova a shita Adam naEva, okwe va lombwela ta ti: “Dalafaneni nokuhapupala ndele yadifeni edu, lo nali kale mepangelo leni.” (Gen. 1:28) Eshi Jehova a popya oshikando shotete elalakano laye, okwa li a fa ta ti “Alfa.” Efimbo otali uya, eshi oludalo laAdam naEva tali ka kala la wanenena noliduliki tali ka yadifa edu noku li lundulula li ninge oparadisa. Eshi elalakano laye tali ka pwa, Jehova ota ka kala a fa ta ti, “Omega.” Konima eshi Jehova a mana okushita “eulu nedu nomangafifi alo,” okwa popya oshinima osho tashi ulike kutya elalakano laye otali ka wanifwa po filufilu. Jehova okwa popya kutya efiku etiheyali oliyapuki. Osho otashi ulike kutya elalakano laJehova li na sha novanhu nosho yo nedu otali ka wanifwa po filufilu pexulilo lefiku etiheyali. — Gen. 2:​1-3. w23.11 5 ¶13-14