17, 18. Hidika ho fitahiana inona avy ho an’ny Isiraely ny faharesen’i Babylona?

¹⁷ Hitondra fanamaivanana ho an’ny Isiraely ny fianjeran’i Babylona. Ny dikan’izany dia hoe ho afaka amin’ny fahababoana izy ireo ary hanana fahafahana hiverina any amin’ny Tany Nampanantenaina. Noho izany, dia nilaza i Isaia izao hoe: “Jehovah hamindra fo amin’i Jakoba ary mbola hifidy ny Isiraely indray ka hamponina azy ao amin’ny taniny; ary ny vahiny hikambana aminy, ary ny taranak’i Jakoba ho namany.

Isaia 14:1,

Ny hoe “Jakoba” eto dia manondro ny Isiraely tamin’ny fitambarany​—ireo foko 12 rehetra. Haneho famindram-po amin’i “Jakoba” i Jehovah, amin’ny famelana ilay firenena hiverina hody.

19. Inona no nilaina, raha tian’ny Isiraely ny hahazo ny famelan-keloka avy amin’i Jehovah, ary inona no ianarantsika avy amin’izany?

¹⁹ Na izany aza, dia tsy hoe tsy nisy fepetra ny famindram-pon’i Jehovah. Tsy maintsy naneho fanenenana noho ny faharatsiany, izay nanosika an’Andriamanitra hanafay azy ireo tamin’ny fomba henjana toy izany, ilay vahoakany. (Jeremia 3:25). Hahazoany ny famelan-keloka avy amin’i Jehovah ny fiekeny heloka amim-pahatsorana sy avy amin’ny fo. (Jereo ny Nehemia 9:6-37; Daniela 9:5.)