Bagabo, mwoba muyobokera ubukuru bwa Kristu?

“Umutwe w’umugabo wese [ni] Kristu.”​—1 KOR. 11:3.

1. Ni igiki kigaragaza yuko Yehova ari Imana y’urutonde?

MU VYAHISHUWE 4:11 hagira hati: “Urabereye, Yehova, egome wewe Mana yacu, kuronka ubuninahazwa n’iteka n’ububasha, kubera ko waremye ibintu vyose, kandi kubera ukugomba kwawe vyarabayeho, kandi vyararemwe.” Kubera ko Yehova Imana ari we Muremyi ni we Segaba Kaminuza w’ijuru n’isi kandi ari hejuru y’ivyo yaremye vyose. Kuba Yehova ‘atari Imana y’umuvurungano, ariko ari iy’amahoro,’ biragaragarira mu buryo umuryango wiwe ugizwe n’abamarayika utunganijwe.​—1 Kor. 14:33; Yes. 6:1-3; Heb. 12:22, 23.

2, 3. (a) Ni nde yabaye ikiremwa ca mbere ca Yehova? (b) Wa Mwana w’imfura afise ikibanza ikihe umugereranije na Se?

² Imbere y’uko Imana irema ikintu na kimwe, yaramaze imyaka idaharurika ari yo yonyene iriho. Ikiremwa cayo ca mbere na mbere cabaye ca kiremwa c’impwemu citwa “Jambo” kubera ko uwo yari Umuvugizi wa Yehova. Ibindi bintu vyose vyabayeho biciye kuri uwo Jambo. Mu nyuma, yaraje kw’isi ari umuntu atagira agasembwa maze yitwa Yezu Kristu.​—Soma Yohani 1:1-3, 14.

³ Ivyanditswe bivuga iki ku bijanye n’ibibanza bitangana Imana be n’Umwana wayo w’imfura bafise? Mu kwandika ahumekewe, intumwa Paulo atubwira ati: “Nshaka ko mumenya yuko umutwe w’umugabo wese ari Kristu; umutwe w’umugore na wo ni umugabo; umutwe wa Kristu na wo ni Imana.” (1 Kor. 11:3) Kristu ari munsi y’ubukuru bwa Se. Ubukuru be n’ukuyoboka ni ntahara kugira ngo habe amahoro n’urutonde mu biremwa bifise ubwenge. Mbere n’umwe ‘ibintu vyose vyaremwe biciye kuri we’ asabwa kuyobokera ubukuru bw’Imana.​—Kol. 1:16.

4, 5. Yezu yabona gute ibijanye n’ikibanza afise umugereranije na Yehova?

⁴ Yezu yabona gute ibijanye no kuyobokera ubukuru bwa Yehova be no kuza kw’isi? Ivyanditswe bivuga biti: “[Kristu Yezu] naho yari mu mero y’Imana, ntiyiyumviriye kunyaga ubukuru, ngo arondere kungana n’Imana. Oya, ahubwo yahevye vyose afata imero y’umushumba, acika uwusa n’abantu. N’ikiruta ivyo, igihe yasanga ameze nk’umuntu, yaricishije bugufi, aragamburuka gushika no ku rupfu, egome, urupfu rwo ku giti co gusinzikarizwako.”​—Flp. 2:5-8.

⁵ Mu bihe vyose, Yezu yarayoboka yicishije bugufi ivyo Se agomba. Yavuze ati: “Sinshobora gukora ikintu na kimwe ndavyigeneye; . . . urubanza nca ruragororotse, kubera ko ntarondera ukugomba kwanje bwite, ahubwo ndondera ukugomba kw’uwandungitse.” (Yoh. 5:30) Yamenyesheje ati: ‘Nama nantaryo nkora ibihimbara Dawe.’ (Yoh. 8:29) Amaja mu mpera y’ubuzima bwa Yezu bwo kw’isi, yavuze mw’isengesho yatuye Se wiwe ati: “Narakuninahaje kw’isi, nkaba ndangije igikorwa wampaye ngo nkore.” (Yoh. 17:4) Biragaragara ko Yezu bitamugora kwemera ubukuru Imana imufiseko.

Kuyobokera Se biratuma Umwana ahakura ivyiza

6. Ni kamere nziza igitangaza izihe Yezu yagaragaje?

⁶ Igihe Yezu yari kw’isi, yaragaragaje kamere nziza igitangaza nyinshi. Muri izo kamere harimwo urukundo rukomeye yagaragarije Se wiwe. Yavuze ati: ‘Ndakunda Data.’ (Yoh. 14:31) Yaranagaragarije abantu urukundo rukomeye. (Soma Matayo 22:35-40.) Yezu yari umunyabuntu kandi yaritwararikana, ntiyari akaze kandi ntiyakandamiza abandi. Yavuze ati: “Nimuze kuri jewe, mwese abacumukura n’abaremerewe, nanje ndabaruhurira. Mwishireko ingǒgo yanje munyigireko, kuko nitonda kandi niyoroheje mu mutima, namwe muzoronka ukuruhuka kw’imitima yanyu. Kuko ingǒgo yanje yoroshe n’umutwaro wanje uhwahutse.” (Mat. 11:28-30) Abantu bameze nk’intama b’imyaka yose, na canecane abacurwa bufuni na buhoro be n’abahahazwa, bararuhurirwa cane na kamere zihimbaye za Yezu be n’ubutumwa buremesha yashikiriza.

7, 8. Mu gihe ca rya Tegeko, ni ibiki wa mukenyezi yari arwaye indwara yo kuva amaraso atashobora gukora, ariko Yezu yamufashe gute?

⁷ Rimbura ukuntu Yezu yafata abakenyezi. Muri kahise hose, abagabo benshi bamye bafata nabi cane abakenyezi. Ivyo ni ko vyari biri ku ndongozi z’idini zo muri Isirayeli ya kera. Ariko Yezu yarafatana icubahiro abakenyezi. Ivyo biragaragarira ku kuntu yafashe wa mukenyezi yari amaze imyaka 12 arwaye indwara yo kuva amaraso. ‘Yari yarababajwe cane’ n’abaganga kandi yari yarasesaguye utwiwe twose arondera gukira. Naho yari yaragize ako kigoro kose, ‘yarushirije kurwara.’ Mu gihe ca rya Tegeko, yabonwa ko ahumanye. Umuntu wese yamukorako na we nyene yaca ahumana.​—Lew. 15:19, 25.

⁸ Igihe uwo mukenyezi yumva ko Yezu yariko arakiza abarwaye, yaciye aja mw’isinzi ryari rimukikuje, yibwira ati: “Ninakora gusa ku mitamana yiwe ndakira.” Yarakoze kuri Yezu, ubwo nyene aca arakira. Yezu yari azi yuko uwo mukenyezi atari akwiye gukora ku mpuzu ziwe. Naho ari ukwo, ntiyamuhambariye. Ahubwo nyabuna, yaramugaragarije ubuntu. Yaratahura ukuntu uwo mukenyezi ategerezwa kuba yari amerewe kubera iyo myaka yose yari amaze arwaye kandi yarabonye ko yipfuza cane uwomufasha. Yezu abigiranye ikibabarwe yamubwiye ati: “Mukobwa, ukwizera kwawe kuragukijije. Genda amahoro, ukire.”​—Mrk. 5:25-34.

9. Igihe abigishwa ba Yezu bagerageza kubuza abana ngo ntibaze aho ari, yavyifashemwo gute?

⁹ Mbere n’abana barumva bamerewe neza bari kumwe na Yezu. Igihe abantu bamuzanira abana, abigishwa biwe barabahambariye, bikaba biboneka ko biyumvira yuko atashaka ko abana bamugora. Ariko ukwo si ko Yezu yabibona. Inkuru yo mu Vyanditswe itubwira iti: “Yezu abibonye biramushavuza hanyuma [a]bwira [abo bigishwa] ati: ‘Nimureke abana batoyi baze kuri jewe; ntimugerageze kubabuza, kuko ubwami bw’Imana ari ubw’abameze nk’abo.’” Vyongeye, yaciye “afata nya bana mu maboko yiwe atangura kubahezagira, abarambitseko ibiganza.” Yezu ntiyihanganira gusa abana, yarabaha ikaze abigiranye igishika.​—Mrk. 10:13-16.

10. Vyagenze gute ngo Yezu agire kamere yagaragaje?

¹⁰ Vyagenze gute ngo Yezu agire kamere yagaragaje igihe yari ng’aha kw’isi? Imbere y’uko aba umuntu nkatwe, yaramaze imyaka idaharurika yihweza Se wiwe wo mw’ijuru arongera arigana ukuntu akora ibintu. (Soma Imigani 8:22, 23, 30.) Igihe yari mw’ijuru, yarabonye ukuntu Yehova akoresha abigiranye urukundo ubukuru afise ku biremwa vyiwe vyose yongera aramwigana. Yezu yoba yari gushobora kubigira iyo ataza kuba ayoboka? Vyaramuhimbara kuyobokera Se wiwe, kandi vyaranezereza Yehova kugira Umwana nk’uwo. Igihe Yezu yari kw’isi, yaragaragaje ata gahaze kamere nziza igitangaza za Se wiwe wo mw’ijuru. Ese ukuntu ari agateka kuri twebwe kuyobokera Kristu, uwo Imana yagenye ngo abe Umutegetsi w’Ubwami bwo mw’ijuru!

Niwigane kamere za Kristu

11. (a) Ni nde dukwiye kwihatira kwigana? (b) Ni kubera iki abagabo bo mw’ishengero ari bo canecane bakwiye kwihatira kwigana Yezu?

¹¹ Abagize ishengero rya gikirisu bose, na canecane abagabo, barakwiye kubandanya bihatira kwigana kamere za Kristu. Nk’uko twamaze kubivuga, Bibiliya igira iti: “Umutwe w’umugabo wese [ni] Kristu.” Nk’uko Kristu yiganye Umutwe wiwe, ni ukuvuga ya Mana y’ukuri, abagabo bakirisu barakwiye kwihatira kwigana umutwe wabo, ari wo Kristu. Igihe intumwa Paulo yacika umukirisu, ivyo ni vyo neza na neza yakoze. Yahimirije abakirisu bagenziwe ati: “Munyigane, nk’uko nanje nigana Kristu.” (1 Kor. 11:1) Intumwa Petero na we yavuze ati: “Iyo nzira ni yo mwahamagariwe, kuko na Kristu yababajwe ku bwanyu, aba abasigiye akarorero kugira ngo mukurikire neza intambuko ziwe.” (1 Pet. 2:21) Impanuro yo kwigana Kristu iraraba canecane abagabo kubera n’iyindi mvo. Ni bo baba abakurambere n’abakozi b’ishengero. Nk’uko Yezu yahimbarwa no kwigana Yehova, abagabo bakirisu bakwiye guhimbarwa no kwigana Kristu be na kamere ziwe.

12, 13. Abakurambere bakwiye gufata gute intama bajejwe?

¹² Abakurambere bo mw’ishengero rya gikirisu babwirizwa kwiga kumera nka Kristu. Petero yahimirije abagabo b’inararibonye, ari bo bakurambere, muri ubu buryo: “Muragire ubusho bw’Imana mujejwe, mutagoberewe, ahubwo mubikunze; atari ku bw’ugukunda inyungu mbi, ahubwo mubishashaye; atari nko mu gukandamiza abari intoranwa y’Imana, ahubwo mu gucika uburorero ku busho.” (1 Pet. 5:1-3) Abakurambere bakirisu ntibakwiye gutwaza igikenye, gukandamiza abandi, gupfa uko babatwaye canke kubakarira. Mu kwigana akarorero ka Kristu, barihatira kuba abanyarukundo, abitwararikana, abicisha bugufi be n’abanyabuntu mu kuntu bafata intama bajejwe.

¹³ Abaja imbere abandi mw’ishengero ni abagabo b’abanyagasembwa, kandi barakwiye kwama bazi ico kintu gituma haba ivyo badashoboye. (Rom. 3:23) Bategerezwa rero kwipfuza cane kwiga ivyerekeye Yezu bakongera bakigana urukundo rwiwe. Barakeneye kuzirikana ku kuntu Imana be na Kristu bafata abantu maze bakihatira kubigana. Petero aduhimiriza ati: “Mwese mukenyere ukwiyorosha kwo mu muzirikanyi mu vyo mugiriranira, kuko Imana irwanya abibona, mugabo iha ubuntu ata wari abukwiriye abicisha bugufi.”​—1 Pet. 5:5.

14. Abakurambere bakwiye gutera iteka abandi ku rugero rungana iki?

¹⁴ Abagabo bagenywe mw’ishengero babwirizwa kugaragaza kamere nziza mu kuntu bafata umukuku w’Imana. Mu Baroma 12:10 hagira hati: “Mu vy’urukundo rwa kivukanyi mugiriranire ikibabarwe. Mu vyo guterana iteka mube aba mbere.” Abakurambere n’abakozi b’ishengero baratera iteka abandi. Nk’uko biri ku bakirisu muri rusangi, abo bagabo babwirizwa ‘kutagira ikintu na kimwe bakora babitumwe n’agatima k’amahane canke ukwishira imbere, ariko bakwiye kwiyumvira biyoroheje mu muzirikanyi yuko abandi babaruta.’ (Flp. 2:3) Abaja imbere abandi nta nkeka ko bakwiye kubona yuko abandi babaruta. Mu kubigenza gutyo, abo bagabo bagenywe bazoba bariko barakurikiza impanuro ya Paulo igira iti: “Mugabo, twebwe abakomeye, tubwirizwa kwikorera ubugoyagoye bw’abadakomeye, ntitwishimishe ubwacu. Umwe wese muri twebwe nashimishe mugenziwe mu vyiza ku bw’ukwubakwa kwiwe. Kuko na Kristu atishimishije ubwiwe.”​—Rom. 15:1-3.

‘Gutera iteka abagore’

15. Abagabo bakwiye gufata gute abagore babo?

¹⁵ Ubu na ho rimbura impanuro Petero yahaye abagabo bubatse. Yanditse ati: “Namwe bagabo, ni kwo kw’ukwo, mushishikare kubana [n’abagore banyu] mwisunze ubumenyi, mubatera iteka nk’abaritera urwavya rurushirije kuba goyigoyi, urw’urugore.” (1 Pet. 3:7) Gutera iteka umuntu bisobanura kubona ko afise agaciro kanini. Ku bw’ivyo, wokwitwararika ivyiyumviro vy’uwo muntu, ivyo akeneye be n’ivyo yipfuza kandi wokwemera kwiyorosha ku bimwerekeye igihe ata kintu gihambaye cotuma utabigira. Ukwo ni ko umugabo akwiye gufata umugore wiwe.

16. Ni ingabisho iyihe Ijambo ry’Imana riha abagabo mu bijanye no gutera iteka abagore?

¹⁶ Igihe Petero yariko abwira abagabo gutera iteka abagore babo, yongeyeko ingabisho igira iti: “Kugira ngo amasengesho yanyu ntatangirwe.” (1 Pet. 3:7) Ivyo birerekana neza yuko Yehova abona ko ukuntu umugabo afata umugore wiwe ari ikintu gihambaye cane. Igihe umugabo adateye iteka umugore wiwe birashobora gutangira amasengesho yiwe. Vyongeye, ubwo muri rusangi abagore ntibakunze kuvyakira neza igihe abagabo babo babateye iteka?

17. Umugabo akwiye gukunda umugore wiwe ku rugero rungana iki?

¹⁷ Ku bijanye n’ukuntu umugabo yokunda umugore wiwe, Ijambo ry’Imana rihanura riti: “Abagabo babwirizwa gukunda abagore babo nk’imibiri yabo bwite. . . . Kuko ata muntu yigeze kwanka umubiri wiwe bwite; ahubwo arawugaburira akawubungabungana urukundo, nk’uko na Kristu agirira ishengero . . . , umwe wese muri mwebwe ku ruhande rwiwe akunde umugore wiwe nk’uko yikunda.” (Ef. 5:28, 29, 33) Abagabo bakwiye gukunda abagore babo ku rugero rungana iki? Paulo yanditse ati: “Bagabo, mushishikare gukunda abagore banyu nk’uko na Kristu yakunze ishengero kandi akitanga ku bwaryo.” (Ef. 5:25) Egome, umugabo akwiye kuba mbere afise umutima ukunze wo gutanga ubuzima bwiwe ku bw’umugore wiwe, nk’uko Kristu yabutanze ku bw’abandi. Igihe umugabo mukirisu afatana ikibabarwe umugore wiwe, akamwitwararika, akamubabara kandi akamufata mu buryo butaranga ubwikunzi, birarushiriza kworohera umugore wiwe kuyoboka ubukuru bwiwe.

18. Ni imfashanyo iyihe abagabo baronka mu bijanye no kwitwararika amabanga bajejwe mu mubano w’ababiranye?

¹⁸ None gusaba abagabo gutera iteka abagore muri ubwo buryo, kwoba ari ukubasaba amananiza? Oya, Yehova ntiyokwigera abasaba gukora ikintu kirengeye ubushobozi bwabo. N’ikindi kandi, abasenga Yehova barashobora kuronka inguvu ikomeye kuruta izindi zose mw’isi no mw’ijuru, iyo na yo ikaba ari impwemu nyeranda y’Imana. Yezu yavuze ati: “Nimba . . . mwebwe, naho muri babi, muzi guha abana banyu ingabirano nziza, ese ingene Data ari mw’ijuru azorushiriza guha impwemu nyeranda abayimusaba!” (Luka 11:13) Mu masengesho abagabo batura, barashobora gusaba yuko Yehova abicishije ku mpwemu yiwe yobafasha mu bijanye n’ukuntu bafata abandi, harimwo n’abagore babo.​—Soma Ibikorwa 5:32.

19. Ikiganiro cacu co kwiga gikurikira kizoca irya n’ino iki?

¹⁹ Vy’ukuri, abagabo barafise ibanga ritoroshe ryo kwiga ukuntu boyobokera Kristu bakongera bakigana ubukuru bwiwe. Mugabo tuvuge iki ku bijanye n’abagore, na canecane abakenyezi? Ikiganiro gikurikira kizoca irya n’ino ukuntu bakwiye kubona uruhara bafise mu ndinganizo ya Yehova.

Bagore, kubera iki mwoyoboka ubukuru?

“Umutwe w’umugore . . . ni umugabo.”​—1 KOR. 11:3.

1, 2. (a) Intumwa Paulo yanditse iki ku bijanye n’indinganizo Yehova yashizeho yerekeye ubukuru be n’ukuyoboka? (b) Ni ibibazo ibihe birimburwa muri iki kiganiro?

YEHOVA yarashinze ingene ibintu bikwiye gukurikirana mu buryo buri ku rutonde, nk’uko intumwa Paulo yabivuze igihe yandika yuko “umutwe w’umugabo wese ari Kristu; umutwe w’umugore na wo [ukaba] umugabo.” (1 Kor. 11:3) Ikiganiro c’imbere y’iki carerekanye yuko Yezu yabona ko kuyobokera Umutwe wiwe, ari we Yehova Imana, ari agateka kandi ko biteye umunezero, congera kirerekana yuko Kristu ari we mutwe w’abagabo bakirisu. Kristu yari umuntu w’umunyabuntu, atekereza, w’umunyempuhwe kandi atagira ubwikunzi mu kuntu yafata abantu. Abagabo bo mw’ishengero bakwiye kumera nk’ukwo nyene mu kuntu bafata abandi, na canecane abagore babo.

² Tuvuge iki none ku vyerekeye abagore? Umutwe wabo ni nde? Paulo yanditse ati: “Umutwe w’umugore . . . ni umugabo.” Abagore bakwiye kubona gute ayo majambo yahumetswe? Iyo ngingo ngenderwako yoba ikwiye gukurikizwa n’igihe umugabo atemera? Kuyobokera ubukuru bw’umugabo vyoba bisaba yuko umugore adakurako umunwa mu mubano w’ababiranye, ni ukuvuga ntihagire ico avuga igihe hariko harafatwa ingingo? Ni mu buryo nyabaki umugore yihesha ugushemezwa?

“Hinge ndamuronderere umufasha”

3, 4. Kubera iki indinganizo y’ubukuru mu mubano w’ababiranye ari ngirakamaro?

³ Indinganizo ijanye n’ubukuru yashizweho n’Imana. Adamu amaze kuremwa, Yehova Imana yavuze ati: “Si vyiza k’uyu muntu yibana wenyene; hinge ndamuronderere umufasha bikwiranye.” Eva amaze kuremwa, Adamu yarahimbawe rwose no kuronka umugenzi akaba n’umufasha ku buryo yavuze ati: “Uyu n’igufa ryo mu magufa yanje, n’akara ko mu mara yanje.” (Ita. 2:18-24) Adamu na Eva bari bafise icizigiro ciza igitangaza co kuvyara umuryango w’abantu batagira agasembwa wose uko wakabaye, bano bakaba bobayeho ibihe bidahera mu gahimbare mw’iparadizo ikwiye kw’isi yose.

⁴ Kubera ubugarariji bw’abavyeyi bacu ba mbere, ukuntu ibintu vyari vyifashe neza mu buryo butagira agahaze muri rya tongo rya Edeni vyarahindutse. (Soma Abaroma 5:12.) Ariko indinganizo y’ubukuru yagumye ikora. Igihe ikurikijwe mu buryo bubereye, irazana ivyiza vyinshi n’umunezero mwinshi mu mubano w’ababiranye. Ibivamwo bica bimera nka kumwe Yezu yumva amerewe ku bijanye no kuyobokera Umutwe wiwe ari we Yehova. Imbere y’uko Yezu aba umuntu nkatwe, ‘yarahimbarwa igihe cose imbere ya Yehova.’ (Imig. 8:30, NW) Kubera agasembwa, abagabo ntibagishoboye kuba imitwe itagira agahaze, eka n’abagore ntibashoboye kuyoboka mu buryo butagira agahaze. Ariko rero, igihe abagabo n’abagore babandanije gukora ivyo bashoboye vyose, iyo ndinganizo ica ituma haboneka umunezero mwinshi ushoboka mu mubano w’ababiranye muri iki gihe.

5. Ni kubera iki abubakanye bakwiye gufata nka nkama impanuro iri mu Baroma 12:10?

⁵ Kugira ngo umubano w’ababiranye uroranirwe, birahambaye cane ko ababiranye bashira mu ngiro iyi mpanuro ishingiye ku Vyanditswe iraba abakirisu bose igira iti: “Mu vy’urukundo rwa kivukanyi mugiriranire ikibabarwe. Mu vyo guterana iteka mube aba mbere.” (Rom. 12:10) N’ikindi kandi, umugabo n’umugore bompi bakwiye kwihatira ‘gucika abanyabuntu kuri bagenzi babo, bakagira impuhwe z’ikibabarwe kandi bakababarirana ata gahigihigi.’​—Ef. 4:32.

Igihe uwo mwubakanye atemera

6, 7. Igihe umugore mukirisu ayobokera umugabo atemera bishobora kuvamwo iki?

⁶ Tuvuge iki igihe uwo mwubakanye atari umusavyi wa Yehova? Akenshi usanga umugabo ari we atemera. Muri ico gihe none umugore akwiye kumufata gute? Bibiliya yishura iti: “Namwe bagore, . . . muyobokere abagabo banyu bwite, kugira ngo, nimba hari abatagamburukira rya jambo, bagondozwe ata jambo rivuzwe, biciye ku ngeso z’abagore babo, kubera biboneye ingeso zanyu zitanduye ziri kumwe n’icubahiro kigera kure.”​—1 Pet. 3:1, 2.

⁷ Ijambo ry’Imana ribwira umugore kuguma afise agatima ko kuyobokera umugabo wiwe atemera. Inyifato yiwe nziza irashobora kugira ico imukozeko bigatuma arimbura ibintu bituma umugore wiwe yigenza muri ubwo buryo bwiza. Ico bivamwo ni uko uwo mugabo yoshobora gusuzuma ivyo umugore wiwe mukirisu yemera maze bigashobora gutuma na we yemera ukuri.

8, 9. Umugore mukirisu yokora iki igihe umugabo wiwe atemera atakiriye neza inyifato yiwe nziza?

⁸ Ariko none, bite ho igihe uwo mugabo atemera atavyakiriye neza? Ivyanditswe biremesha umugore yemera kugaragaza kamere za gikirisu ibihe vyose, naho ivyo vyoba bigoye gute. Nk’akarorero, mu 1 Abakorinto 13:4 dusoma duti: “Urukundo ruriyumanganya.” Vyoba vyiza rero umukenyezi mukirisu abandanije kugira inyifato irangwa “n’ukwiyorosha kwo mu muzirikanyi n’ubwitonzi bikwiye, hamwe n’ukwiyumanganya,” akihanganira ivyo bintu abigiranye urukundo. (Ef. 4:2) Abifashijwemwo n’inguvu zikora z’Imana, ni ukuvuga impwemu nyeranda yayo, birashoboka ko aguma afise kamere za gikirisu naho yoba ari mu bintu bigoye.

⁹ Paulo yanditse ati: “Mu bintu vyose, ndonka inkomezi ndabikesheje umwe ampa ububasha.” (Flp. 4:13) Impwemu y’Imana iratuma umwe mu bubakanye w’umukirisu akora ibintu vyinshi atoshoboye gukora itamufashije. Nk’akarorero, igihe umuntu afashwe nabi n’uwo bubakanye vyoshobora gutuma yumva yokwihora. Yamara rero, Bibiliya ibwira abakirisu bose iti: “Ntihagire n’umwe mwishura ikibi ku kindi. . . . Kuko vyanditswe ngo: ‘Uguhora ni ukwanje; ni jewe nzosubiriza mu nkoko, ni ko Yehova avuga.’” (Rom. 12:17-19) Muri ubwo buryo nyene, mu 1 Abanyatesalonika 5:15 haduhanura hati: “Murabe ntihagire uwishura uwundi ikibi ku kindi, ahubwo mwame nantaryo mukurikirana iciza ku bijanye na bagenzi banyu no ku bandi bose.” Tubifashijwemwo n’impwemu nyeranda ya Yehova, turashobora gukora ivyo tutoshoboye gukora n’inguvu zacu bwite. Ese ukuntu bibereye ko dusenga dusaba yuko impwemu nyeranda y’Imana ituronsa ivyo duhajije!

10. Yezu yavyifatamwo gute igihe abandi baba bavuze amajambo ababaza canke bakoze ibintu bibabaza?

¹⁰ Yezu yaratanze akarorero kibonekeje mu bijanye n’ukuntu yafata abantu baba bamubwiye canke bamukoreye ibintu bibabaza. Muri 1 Petero 2:23 havuga hati: “Igihe yatukwa, ntiyasubizayo igitutsi. Igihe yababazwa, ntiyahiga, mugabo yaguma yiha umwe aca imanza mu bugororotsi.” Duhimirizwa gukurikiza akarorero keza yatanze. Ntushavuzwe n’inyifato mbi y’abandi. Nk’uko abakirisu bose bahanurwa kubigira, ‘nugire impuhwe z’ikibabarwe, wicishe bugufi mu muzirikanyi, ata kwishura ikibi ku kindi canke igitutsi ku kindi.’​—1 Pet. 3:8, 9.

Boba badakwiye gukurako umunwa mu mubano w’ababiranye?

11. Abagore bakirisu bamwebamwe bazogira uruhara mu gateka gahambaye akahe?

¹¹ Kuyobokera ubukuru bw’umugabo vyoba bisobanura yuko abagore badakwiye gukurako umunwa mu mubano w’ababiranye, ntibagire ico bavuga mu bibazo vyo mu muryango canke mu bindi bintu? Uwokubesha. Yehova aratera uduteka twinshi abagore n’abagabo. Zirikana gatoyi kw’iteka rihambaye ba bantu 144.000 bafise ryo kuba abami n’abaherezi mw’ijuru bayoborwa na Kristu igihe azoba ategeka iyi si! Muri ico gitigiri harimwo n’abagore. (Gal. 3:26-29) Biragaragara ko Yehova yajeje abagore uruhara rutuma bagira ico bakoze mu kuntu yaringanije ibintu.

12, 13. Tanga akarorero kerekana ko abagore băvuga ubuhanuzi.

¹² Nk’akarorero mu bihe vya Bibiliya, abagore baravuga ubuhanuzi. Muri Yoweli 2:28, 29 habuye hati: “Nzosuka [i]mpwemu [y]anje ku bari n’umubiri bose; abahungu banyu n’abakobga banyu bazovugishwa nanje. . . . N’abagurano banje b’abahungu n’abakobga muri iyo misi nzobasukako [i]mpwemu [y]anje.”

¹³ Mu bigishwa ba Yezu bashika 120 bari bakoraniye mu cumba co hejuru i Yeruzalemu ku musi wa Pentekoti yo mu 33 G.C., harimwo abagore n’abagabo. Impwemu y’Imana yarasutswe kuri uwo mugwi wose uko wakabaye. Ni co gituma Petero yashoboye gusubiramwo ivyo umuhanuzi Yoweli yari yaravuze maze avyerekeza ku bagabo cokimwe n’abagore. Petero yavuze ati: “Ibi ni ivyavuzwe biciye ku muhanuzi Yoweli, ngo: ‘Kandi mu misi ya nyuma,’ ni ko Imana ivuga, ‘nzosuka igice c’impwemu yanje ku bari n’umubiri b’ubwoko bwose, kandi abahungu banyu n’abakobwa banyu bazovuga ubuhanuzi . . . ; mbere nzosuka no ku bashumba banje be no ku bashumbakazi banje igice c’impwemu yanje muri iyo misi, na bo bazovuga ubuhanuzi.’”​—Ibik. 2:16-18.

14. Ni uruhara uruhe abagore baranguye mu gukwiragiza ubukirisu bwo mu ntango?

¹⁴ Mu kinjana ca mbere, abagore baragize uruhara ruboneka mu gukwiragiza ubukirisu. Barabwiye abandi ivyerekeye Ubwami bw’Imana bongera barakora ibintu bifitaniye isano n’ico gikorwa co kwamamaza. (Luka 8:1-3) Nk’akarorero, intumwa Paulo yise Foyibe ngo “umusuku w’ishengero riri i Kenkereya.” Vyongeye, igihe Paulo yariko arungikira indamukanyo abakozi bagenziwe, yaravuze abakenyezi batari bake b’abizigirwa, harimwo na “Tirifena na Tirifoza, abagore bakora cane mu Mukama.” Yaravuze kandi “Perusi umukundwa wacu, kuko yabize akuya cane mu Mukama.”​—Rom. 16:1, 12.

15. Ni uruhara uruhe abagore barangura mu gukwiragiza ubukirisu muri iki gihe cacu?

¹⁵ Muri iki gihe cacu, igice kinini c’abantu barenga imiliyoni indwi bamamaza inkuru nziza y’Ubwami bw’Imana hirya no hino kw’isi, ni abagore b’imyaka itandukanye. (Mat. 24:14) Benshi muri bo ni abasuku b’igihe cose, abamisiyonari, n’abari mu bagize imiryango ya Beteli. Umwanditsi wa Zaburi Dawidi yaririmvye ati: “Umwami Imana yaravuze: Abagore bakwiza inkuru baba ingabo nyinshi.” (Zab. 68:11) Ese ukuntu ayo majambo yagaragaye ko ari ay’ukuri! Yehova araha agaciro uruhara abagore barangura mu kwamamaza inkuru nziza no mu gushitsa imigambi yiwe. Ivyo asaba bijanye n’uko abagore bakirisu bayoboka nta gukeka yuko bidasobanura ko badakwiye gukurako umunwa.

Abagore babiri baseruye ivyiyumviro vyabo

16, 17. Akarorero ka Sara kerekana gute ko abagore badakwiye kuba abadakurako umunwa mu mubano w’ababiranye?

¹⁶ Nimba Yehova atera uduteka twinshi abagore, none abagabo ntibakwiye kugisha inama abagore babo imbere y’uko bafata ingingo zikomakomeye? Boba bakoze ibiranga ubukerebutsi babigenjeje gutyo. Ivyanditswe biravuga ibintu bitari bike vyashitse aho abagore bagize ico bavuga canke bakoze mbere batarinze kubisabwa n’abagabo babo. Rimbura uturorero tubiri.

¹⁷ Sara, umugore w’umwe sekuruza w’imiryango Aburahamu, yaguma amubwira ngo yirukane umugore wiwe agira kabiri be n’umwana wiwe kubera ko batubaha. ‘Aburahamu vyaramubabaje cane,’ ariko ntivyababaje Imana. Yehova yabwiye Aburahamu ati: “Reka kubabazwa n’ivy’uwo mwana n’incoreke yawe: ivyo Sara akubariye vyose n’uvyemere.” (Ita. 21:8-12) Aburahamu yaragamburukiye Yehova, arumviriza Sara, araheza akora ivyo uno yamusavye.

18. Ni igiki Abigayili yibwirije gukora?

¹⁸ Zirikana kandi ku bijanye na Abigayili muka Nabali. Igihe Dawidi yariko arahunga wa Mwami w’ishari Sauli, yaramaze igihe akambitse hafi y’imikuku ya Nabali. Aho kugira ngo Dawidi agire ico atwaye mu matungo menshi y’uwo mugabo w’umutunzi, we hamwe n’abantu biwe barakingiye ivyo atunze. Ariko rero, Nabali “yar’umuntu w’ikigoryi kandi w’imico mibi,” kandi ‘yararandamukiye’ abantu ba Dawidi. Yari “umuntu w’umugesera,” kandi ‘ubujuju ni yo yari kamere yiwe.’ Igihe abantu ba Dawidi basaba Nabali babigiranye icubahiro ngo abahe ibifungurwa, yaranse. None Abigayili yaciye akora iki igihe yumva ivyari vyabaye? Atarinze kubibwira Nabali, yaciye “[a]kwakwanya, arakora imitsima amajana abiri, n’imikuza ibiri ya vino, n’inyama zihiye z’amapfizi atanu y’intama, n’ingero zitanu z’ingano zikaranze, n’imisoko ijana y’inzabibu zumye, n’uturobe amajana abiri tubumbabumbge mu nsukoni” maze abihereza Dawidi n’abantu biwe. Abigayili yoba yakoze ibibereye? Bibiliya ivuga iti: “Uhoraho akubita Nabali, arapfa.” Mu nyuma Dawidi yaciye arongora Abigayili.​—1 Sam. 25:3, 14-19, 23-25, 38-42.

‘Umugore yihesha ugushimwa’

19, 20. Ni igiki gituma umugore aba uwubereye gushemezwa vy’ukuri?

¹⁹ Ivyanditswe birakeza umugore akora ibintu nk’uko Yehova abigomba. Igitabu co muri Bibiliya c’Imigani kirashemagiza “umugore aroranye,” mu kuvuga giti: “[Ni] uw’igiciro kurusha utubuyenge twitwa marijani. Umutima w’umugabo wiwe wama umwizigira, kand’i we ntihabura inyungu. Uyo mugore amugirira neza, ntamugirira nabi, imisi yose y’ukubaho kwiwe.” N’ikindi kandi, “iy’ateranuye akanwa avuga ivy’ubgenge, icagezwe c’ineza kiri ku rurimi rwiwe. Agendeza ingeso z’abo mu rugo rwabo, kandi ntarya ivyo kurya vy’ukwamikara. Abana biwe bava hasi bakamuhezagira, n’umugabo wiwe na we, akamushemagiza.”​—Imig. 31:10-12, 26-28.

²⁰ Ni igiki gituma umugore aba uwubereye gushemezwa vy’ukuri? Mu Migani 31:30 havuga hati: “Akazuru gusa karahendana, n’ubgiza bgo ku rukoba nta co bumaze, arik’umugore yubaha Uhoraho ni we ashimwa.” Mu kwubaha Yehova harimwo ivy’uko bikenewe ko umuntu ayoboka n’umutima ukunze indinganizo Imana yashizeho ijanye n’ubukuru. Bibiliya ivuga iti: “Umutwe w’umugore . . . ni umugabo,” nk’uko “umutwe w’umugabo wese ari Kristu,” kandi “umutwe wa Kristu . . . ni Imana.”​—1 Kor. 11:3.

Nukenguruke ingabirano Imana yatanze

21, 22. (a) Ni imvo izihe abakirisu bubatse bafise zo gukenguruka ingabirano Imana yatanze y’umubano w’ababiranye? (b) Kubera iki dukwiye kwubaha indinganizo Yehova yashizeho zijanye n’ubukuru? (Raba uruzitiro ruri ku rupapuro rwa 17.)

²¹ Abakirisu bubatse izabo barafise imvo nyinshi cane zo gukengurukira Imana! Barashobora kugenda bafatanye amaboko ari abubakanye bahimbawe. Barashobora na canecane gukenguruka ingabirano yahezagiwe y’umubano w’ababiranye itangwa n’Imana, kubera ko ituma baronka akaryo ko kunywana mu buzima maze bakagendana na Yehova. (Rusi 1:9; Mika 6:8) Kubera yuko ari we yatanguje umubano w’ababiranye arazi neza na neza ibisabwa kugira ngo umubano w’ababiranye ubemwo agahimbare. Niwame ukora ibintu nk’uko abigomba, maze ‘umunezero w’Uhoraho uzoba inkomezi zawe,’ mbere no muri iyi si idurumbanye.​—Neh. 8:10.

²² Umugabo mukirisu akunda umugore wiwe nk’uko yikunda azokoresha ubukuru bwiwe abigiranye ikibabarwe n’ukwitwararikana. Umugore wiwe atinya Imana azoba uwubereye gukundwa vy’ukuri, kuko azomushigikira akongera akamugaragariza icubahiro kigera kure. Igihambaye kuruta vyose, umubano wabo w’akarorero uzotera iteka ya Mana yacu Yehova ibereye gushemezwa.