Amakoraniro y’Ivyabona vya Yehova yokugirira akamaro akahe?

Woba urigera witaba amakoraniro y’Ivyabona vya Yehova? Ushobora kuba uhagaritse umutima wiyumvira ukuntu bizogenda ushitseyo ari bwo bwa mbere. Ushobora kuba uriko wibaza uti: ‘Ni ibiki bibera kuri ayo makoraniro? Kubera iki ahambaye? Kubera iki noyitaba?’ Muri iki cigwa uraza kubona ingene gukoranira hamwe n’abandi bishobora gukomeza ubucuti ufitaniye n’Imana bikongera bikagufasha ku giti cawe bwite.

1. Imvo nyamukuru ituma dukoranira hamwe n’abandi ni iyihe?

Raba ivyo umwanditsi umwe wa Bibiliya yavuze ku bijanye n’imvo nyamukuru ituma dukoranira hamwe n’abandi, ati: “Nzohezagira Yehova mu makinja akoranye.” (Zaburi 26:12) Muri ubwo buryo nyene Ivyabona vya Yehova barahimbarwa no gukoranira hamwe n’abandi ku bwo gusenga. Hirya no hino kw’isi, barahurira hamwe buri ndwi kugira bashemeze Imana, baririmbe bongere basenge. Mu bihe bimwebimwe na ho buri mwaka, barahurira hamwe ari imigwi mininiminini.

2. Ni ibiki uzokwiga ku makoraniro yacu?

Kuri ayo makoraniro, ahanini twiga Ijambo ry’Imana, “rikaza rirasigurwa ryongera ritangirwa insobanuro.” (Soma Nehemiya 8:8.) Niwayitaba uzokwiga ivyerekeye Yehova be n’ukuntu ameze. Kandi uko uzorushiriza kumenya ko agukunda ni ko uzorushiriza kumwiyegereza. Uzomenya kandi ukuntu ashobora kugufasha kugira ubuzima buhimbaye.—Yesaya 48:17, 18.

3. Kwitaba amakoraniro yacu vyokugirira akamaro akahe?

Yehova adusaba ko ‘twiyumvirana kugira tuvyuriranire ugukundana n’ibikorwa vyiza no kudaheba kwa gukoranira hamwe kwacu.’ (Abaheburayo 10:24, 25) Ku makoraniro yacu, uzohahurira n’abantu bitwararikana kandi bipfuza kwiga ivyerekeye Imana nkawe. Uzohimbarwa kandi no kwumva ivyiyumviro biremesha bakuye muri Bibiliya. (Soma Abaroma 1:11, 12.) Vyongeye uzomenyana n’abandi basavyi ba Yehova bahimbawe naho batabuze ingorane. Izo ni imvo zimwezimwe zituma Yehova yipfuza ko twama dukoranira hamwe n’abandi.

TWINJIRE MU MIZI

4. Amakoraniro y’Ivyabona vya Yehova

Abakirisu bo mu ntango bama bakoranira hamwe kugira basenge Yehova. (Abaroma 16:3-5) Nimusome Abakolosayi 3:16, muce muganira kuri iki kibazo:

• Abakirisu bo mu ntango basenga Yehova gute?

IVIDEWO: Ingene tugira amakoraniro ajanye no gusenga (2:12)

• Ni amasano ayahe wabonye hagati y’ibibera mu makoraniro y’Ivyabona vya Yehova n’ibivugwa mu Bakolosayi 3:16?

• Muri iyo videwo canke kuri iyo foto, hari ikindi kintu washimye ku bijanye n’amakoraniro?

Nimusome 2 Abakorinto 9:7, muce muganira kuri iki kibazo:

• Kubera iki mu makoraniro y’Ivyabona vya Yehova badatoza imperezwa canke ibigiracumi?

Uri kumwe n’uwukwigisha Bibiliya nimurabire hamwe ivyo tuzokwiga kuri rimwe mu makoraniro yo muri ino ndwi.

• Ni igice ikihe c’ikoraniro kikuryoheye kuruta?

Wari ubizi?

Kuri jw.org urashobora kuhasanga umwanya n’ikibanza amakoraniro aberako hirya no hino kw’isi.

1. Amakoraniro yacu aba agizwe n’insiguro, udukino n’amavidewo. Atanguzwa kandi agasozerwa n’ururirimbo be n’isengesho

2. Mu biganiro bimwebimwe abumviriza barashobora gushikiriza ivyiyumviro

3. Abantu bose barashobora kuyitaba, yaba imiryango, abatarubaka, abageze mu zabukuru be n’abana

4. Kwinjira ni ku buntu kandi nta mperezwa zitozwa

5. Kwitaba amakoraniro bisaba akigoro

Raba nk’akarorero umuryango Yezu yakuriyemwo. Kugira bitabe umusi mukuru waba buri mwaka, bagira urugendo rw’imisi itatu n’amaguru, bava i Nazareti baja i Yeruzaremu kandi baca mu misozi. Nimusome Luka 2:39-42, muce muganira kuri ibi bibazo:

• Wibaza ko kugira urwo rugendo rwo kuja i Yeruzalemu vyari vyoroshe?

• Kubera iki kwitaba amakoraniro vyogusaba akigoro?

• Wibaza ko vyoba bihambaye kugira ako kigoro? Kubera iki wishuye gutyo?

• Kubera iki tudakwiye gusiba ku makoraniro?

INCAMAKE

Kwitaba amakoraniro bizogufasha kumenya vyinshi ku vyerekeye Yehova, gukomeza ubucuti ufitaniye na we be no kumusenga uri kumwe n’abandi.

Wize iki?

• Kubera iki Yehova adusaba kwitaba amakoraniro?

• Ni ibiki uzokwigira ku makoraniro y’Ivyabona vya Yehova?

• Hari ikindi kintu ubona amakoraniro yokumarira?

RONDERA N’IBINDI

Woba utinya kwitaba amakoraniro? Raba icatumye uwo mugabo akunda amakoraniro.

Ntituzopfa twibagiye ukuntu yaturamukije (4:16)

Nurabe ingene uyu musore yahavuye akunda amakoraniro be n’ico yakoze kugira agume ayitaba.

Narakunze cane amakoraniro (4:33)

Nurabe ingene abandi biyumva igihe bitavye amakoraniro.

“Kubera iki twoja ku makoraniro ku Ngoro y’Ubwami?” (Ikiganiro co kuri jw.org)

Raba ingene umugabo yahoze mu kagwi k’inkozi z’ikibi yahindutse kuva aho atanguriye kwitaba amakoraniro y’Ivyabona vya Yehova.

“Nta ho naja ntafise inkoho yanje” (Umunara w’Inderetsi, 1 Mukakaro 2014)

5. Ibintu vyo kw’isi vyarahindutse kuva mu 1914

Nimurabe iyo VIDEWO.

IVIDEWO: Ibintu vyo kw’isi vyarahindutse kuva mu 1914 (1:10)

Yezu yari yaravuze ibintu vyobaye kw’isi amaze kuba Umwami. Nimusome Luka 21:9-11, muce muganira kuri iki kibazo:

• Muri ivyo bintu dusomye, ni ibiki umaze kwibonera canke kwumva?

Intumwa Paulo yaravuze ukuntu abantu bobaye bameze mu kiringo ca nyuma c’intwaro z’abantu. Nimusome 2 Timoteyo 3:1-5, muce muganira kuri iki kibazo:

• Woba umaze kwibonera abantu bameze gutyo muri iki gihe?

6. Niwerekane yuko wemera ko Ubwami bw’Imana buriko buraganza

Nimusome Matayo 24:3, 14, muce muganira kuri ibi bibazo:

• Ni igikorwa gihambaye ikihe cerekana ko Ubwami bw’Imana buriko buraganza?

• Ni gute wogira uruhara muri ico gikorwa?

Ubu Ubwami bw’Imana buriko buraganza, kandi igihe c’uko buganza isi yose kiriko kiregereza. Nimusome Abaheburayo 10:24, 25, muce muganira kuri iki kibazo:

• Ni igiki umwe wese muri twebwe yokora uko ‘tubona uwo musi wegereza’?