Omafimbo omativali
25 Amasia okwa li e na eedula 25, eshi a ninga ohamba, nokwa pangela muJerusalem oule weedula 29. Edina laina oJehoadan womuJerusalem. 2 Okwa twikila okuninga osho sha yuka momesho aJehova, ashike ka li e shi ninga nomutima aushe. 3 Diva eshi ouhamba wa pamekwa koshi yepangelo laye, okwa dipaa ovapiya vaye, ovo va dipaa xe, ohamba. 4 Ashike ina dipaa ovanamati vavo, molwaashi okwa katuka metwokumwe naasho sha shangwa mOmhango, oyo i li membo laMoses, omo Jehova a popya a ti: “Ooxe kave na okudipawa omolwoshinima osho ovana va ninga, novana kave na okudipawa omolwoshinima osho ooxe va ninga; omunhu oku na ashike okudipawa omolwenyono laye mwene.”
5 Amasia okwa ongela pamwe Ovajuda nokwe va fikameka pamaukwaneumbo omapata, omalenga taa pashukile omayovi nomalenga taa pashukile omafele aJuda naBenjamin ashishe. Okwa shangifa ovo ve na eedula okudja 20 okuyuka pombada, nokwa mona mo ovakwaita va deulwa* 300 000 va waimine etangakwaita, tava dulu okulongifa eonga noshikelelifo sha kula. 6 Okudja opo, okwa futa ovakwaita ovanaenghono 100 000 va dja kuIsrael oitalenti* yoshisilveri 100. 7 Ashike omupiya waKalunga kashili okwe uya kuye, ndele ta ti: “Akutu ohamba, ino ya pamwe netangakwaita lOvaisrael, molwaashi Jehova ke li pamwe naIsrael, noke li nande pamwe naumwe womOvaefraim. 8 Ponhele yaasho, inda oove auke, ndele to lu oita wa nyatipala. Kalunga kashili oku na eenghono doku ku kwafela. Ngeenge hasho, ota ka efa omutondi woye e ku finde.” 9 Opo nee Amasia okwa pula omupiya waKalunga kashili, a ti: “Ongahelipi shi na sha noitalenti 100, oyo nda yandja komatangakwaita aIsrael?” Omupiya waKalunga kashili okwa nyamukula, a ti: “Jehova ota dulu oku ku pa shihapu shi dulife pwaasho.” 10 Onghee Amasia okwa lekela omatangakwaita, oo e uya kuye, a dja kuEfraim, e a shunifa keenhele dao. Ndele omatangakwaita oo okwa li a handukila neenghono Juda, nokwa shuna keenhele dao a fula onya.
11 Opo nee Amasia okwe linyatipaleka nokwa kwatela komesho omatangakwaita aye, ndele tava i kEfilu lOmongwa. Okwa dipaa ovalumenhu vokuSeir 10 000. 12 Ovalumenhu vokuJuda ova kwata ko ovalumenhu 10 000 ve na omwenyo. Ove va twala koxulo yemanya, ndele tave va undulile pedu okudja koxulo yemanya, naaveshe ova li va tekauka moinhimbu. 13 Ashike omatangakwaita, oo Amasia a shunifa, opo ehe mu waimine moita, okwa piluka, ndele taa ponokele oilando yaJuda, okudja kuSamaria fiyo okuBet-horon; okwa dipaa 3 000 omuvo nokwa kufa po oixuulwa* ihapu.
14 Eshi Amasia a aluka kokulwifa Ovaedom, okwa etelela ookalunga vovalumenhu vokuSeir, nokwe va tula po ve li ookalunga vaye, ndele ta hovele oku ve linyongamena noku va twimina omatwiminoyambo. 15 Onghee Jehova okwa li a handukila neenghono Amasia, nokwe mu tumina omuprofeti, oo e mu pula, a ti: “Omolwashike to longele ookalunga, ovo inava dula okuxupifa ovanhu vavo meke loye?” 16 Ofimbo omuprofeti a li ta popi, ohamba oye mu pula, ya ti: “Otwe ku tula po u li omuyandjimayele wohamba? Mwena, ohandi ku dipaifa, ngeenge oto twikile okupopya!” Ndele ofimbo omuprofeti ina mwena, okwa ti: “Ondi shi shii kutya Kalunga okwa tokola oku ku hanauna po, molwaashi owa ninga oshinima eshi, noino pwilikina komayele ange.”
17 Konima eshi Amasia, ohamba yaJuda, a kundafana novayandjimayele vaye, okwa tumina etumwalaka Joas, ohamba yaIsrael, omonamati waJoahas, omonamati waJehu, a ti: “Ila, tu lwifafane molwoodi.”* 18 Joas, ohamba yaIsrael, okwa tuma etumwalaka kuAmasia, ohamba yaJuda, a ti: “Oshimeno shomakiya shokuLibanon osha tumina omusederi wokuLibanon etumwalaka, sha ti: ‘Yandja omonakadona woye a ninge omukulukadi womonamati wange.’ Ndele oshifitukuti shokuLibanon osha enda po, ndele tashi lyata oshimeno shomakiya. 19 Owe lipopila wa ti: ‘Tala, onda* hanauna po Edom.’ Onghee omutima woye owe linenepeka nowa hala okufimanekwa. Ndele paife kala meumbo* loye mwene. Omolwashike u na okulietela oshiponga nokuteka po, ove pamwe naJuda?”
20 Ashike Amasia ina pwilikina, osheshi osha li ehalo laKalunga kashili oku va yandja meke lomutondi, molwaashi ova shikula ookalunga vokuEdom. 21 Onghee Joas, ohamba yaIsrael, okwa ya, ndele ta ka shakeneka Amasia, ohamba yaJuda, molwoodi, puBet-semes shaJuda. 22 Juda okwa li a findwa kuIsrael, onghee keshe umwe okwa faduka po, a ya keumbo* laye. 23 Joas, ohamba yaIsrael, okwa kwata po Amasia, ohamba yaJuda, omonamati waJoas, omonamati waJoahas,* puBet-semes. Opo nee okwe mu eta kuJerusalem, ndele ta teyaula po ekuma laJerusalem, okudja pOshivelo shaEfraim fiyo okOhuke yOshivelo, oule womaludimbo 400.* 24 Okwa kufa oshingoli ashishe, oshisilveri noinima aishe oyo a hanga meumbo laKalunga kashili, pamwe* naObed-edom, naayo a hanga meemhungulilo domeumbo* lohamba nosho yo eenghwate. Opo nee okwa shuna kuSamaria.
25 Amasia, ohamba yaJuda, omonamati waJoas, okwa kala nomwenyo eedula 15, konima yefyo laJoas, omonamati waJoahas, ohamba yaIsrael. 26 Ondjokonona aishe yaAmasia, okudja pehovelo fiyo opexulilo, tala, mbela inai shangwa mEmbo lEehamba daJuda nodaIsrael? 27 Okudja pefimbo opo, eshi Amasia a efa po okushikula Jehova, ova pangela omhangela, ve mu ponokele muJerusalem, ashike okwa ya onhapo kuLakis, ndele ova tuma ovalumenhu kuLakis ve mu shikule nove mu dipaela oko. 28 Onghee ova dja ko ve mu humbata keenghambe, nove mu paka pooxekulululwa moshilando shaJuda.