Omafimbo omativali

6 Pefimbo opo, Salomo okwa ti: “Jehova okwa ti kutya ota ka kala momilaulu fokofoko. 2 Onde ku tungila eumbo la tumbala, onhele ya pamenena, u kale mo fiyo alushe.”

3 Opo nee ohamba oya piluka, noya hovela okunangeka noupuna eongalo alishe laIsrael, ofimbo eongalo alishe laIsrael la fikama. 4 Ohamba oya ti: “Jehova, Kalunga kaIsrael, na tangwe, oo a anena tate, David, nokanya kaye, nokwa wanifa po eudaneko laye neke laye, a ti, 5 ‘Okudja kefiku olo nda kufa oshiwana shange medu laEgipiti, inandi hoolola nande oshilando momapata aeshe aIsrael, omo tamu ka tungilwa eumbo lokufimanekifila edina lange, noinandi hoolola omunhu a wilike oshiwana shange Israel. 6 Ashike onda hoolola Jerusalem, omo mu fimanekifilwe edina lange, nonda hoolola David a wilike oshiwana shange Israel.’ 7 Ndele tate, David, okwa li a halelela okutungila Jehova, Kalunga kaIsrael, eumbo lokufimanekifila edina laye. 8 Ashike Jehova okwa lombwela tate, David, a ti: ‘Owa li wa halelela okutunga eumbo lokufimanekifila edina lange, nowa ninga nawa, eshi wa li u na ehalo lokuninga ngaho. 9 Ndele haave to tungu eumbo olo, ashike omonamati woye, oo to ka dalelwa,* oye ta ka tunga eumbo omo tamu ka fimanekelwa edina lange.’ 10 Jehova okwa wanifa po eudaneko olo a udaneka, molwaashi onda pingena po tate, David, nondi li omutumba kolukalwapangelo laIsrael, ngaashi ashike Jehova a udaneka. Onda tunga yo eumbo lokufimanekifila edina laJehova, Kalunga kaIsrael, 11 nonda tula mo Oshikefa omo mu na oipelende yehangano, olo Jehova a li a ninga noshiwana shaIsrael.”

12 Opo nee Salomo okwa fikama komesho yoaltari yaJehova moipafi yeongalo alishe laIsrael, nokwa yelula omake aye pombada. 13 (Osheshi Salomo okwa li a ninga omutune wongopolo nokwa li e u tula pokati koshihale.* Owa li u na oule womukokomoko womaludimbo* atano, ounene womaludimbo atano, noule wopombada womaludimbo atatu. Okwa li ofika kuo.) Okwa twa eengolo komesho yeongalo alishe laIsrael, nokwa yelula omake aye pombada, 14 ndele ta ti: “Jehova, Kalunga kaIsrael, kaku na vali Kalunga umwe e ku fa, kutya nee omeulu, ile okombada yedu, mokudiinina ehangano nokuulikila ovapiya voye ohole i na oudiinini, ovo hava dulika kwoove nomutima wavo aushe. 15 Owa wanifa po eudaneko olo wa udanekela omupiya woye, tate, David. Owa udaneka nokanya koye, nowa wanifa po eudaneko olo neke loye nena eli. 16 Ndele paife, Jehova, Kalunga kaIsrael, wanifa po eudaneko olo wa udanekela omupiya woye, tate, David, eshi wa ti: ‘Ngeenge ovanamati voye ova lungamene onghedi yokukalamwenyo kwavo, mokukala ovadiinini kwaame, ngaashi ove wa kala omudiinini kwaame, kolukalwapangelo laIsrael otaku ka kala alushe omulumenhu womoludalo loye.’ 17 Ndele paife, alikana, Jehova, Kalunga kaIsrael, eudaneko olo wa udanekela omupiya woye, David, nali kale li shii okulineekelwa.

18 “Ndele mbela Kalunga ota kala ngoo shili kombada yedu pamwe novanhu? Tala, ngeenge eulu, olo li li pombadambada, itali ku wanene, mbela eumbo linini, olo nda tunga, olo nee tali ku wanene? 19 Alikana, Jehova, Kalunga kange, pwilikina keilikano nokeindilo lomupiya woye, pwilikina yo komupiya woye, eshi te ku pula ekwafo, nokeilikano laye, olo te ku ilikana. 20 Omesho oye naa pashukile eumbo eli oufiku nomutenya, onhele oyo wa popya kutya edina loye omo tali kala, u pwilikine keilikano lomupiya woye, oo ta ilikana a taalela konhele ei. 21 Pwilikina komupiya woye, eshi te ku indile ekwafo, nokomaindilo oshiwana shoye Israel, eshi tashi ilikana sha taalela konhele ei, nokupwilikina kuvo okudja monhele yoye yokukala, meulu. Va uda, ndele to va dimine po.

22 “Ngeenge omunhu a nyono kumukwao, ndele ta ningifwa eano,* olo la kwatela mo efingo, ndele konima eshi a ninga eano* olo ta ka fikama komesho yoaltari yoye, oyo i li meumbo eli, 23 alikana, pwilikina kuye okudja meulu, ndele to katuka onghatu, nokutokola ovapiya voye mokushunifila omukolokoshi noku mu pa ondjabi yoilonga yaye ii nosho yo mokupopya kutya omuyuki ke na ondjo, noku mu pa ondjabi she likolelela koilonga yaye youyuki.

24 “Ngeenge oshiwana shoye Israel sha findwa kovatondi vasho, molwaashi sha kala tashi nyono kwoove, ndele tashi alukile kwoove, tashi tumbalekifa edina loye, tashi ilikana koshipala shoye nokupula ekwafo kwoove meumbo eli, 25 alikana, uda oshiwana shoye Israel okudja meulu, noku shi dimina po, ndele to shi alulile kedu olo we shi pa nosho yo ooxekulululwa.

26 “Ngeenge eulu ola londo, nodula oya kala inai loka, molwaashi va kala tava nyono kwoove, ndele tava ilikana va taalela konhele ei, tava tumbalekifa edina loye nokweefa po omanyono avo, molwaashi we va ningifa ve lininipike, 27 alikana, uda ovapiya voye okudja meulu, ndele to dimi po omanyono avo, omanyono oshiwana shoye Israel, osheshi oove to va hongo ondjila ya yuka, oyo ve na okweenda nayo. Lokifa yo odula medu loye, olo wa pa oshiwana shoye li li efyuululo.

28 “Ngeenge ondjala oye uya moshilongo, ile oudu wolutapo, omhepo ipyu, oimeno tai kukuta, oshipaxu osho hashi ende meengudu, ile oshipaxu sha nyika oshiponga, ile ngeenge ovatondi vavo ve va kondekele mushimwe shomoilando yomoshilongo osho,* ile ehandukilo loludi limwe li lili, ile omukifi, 29 eilikano keshe, nakeshe osho tashi indilwa komunhu keshe, ile koshiwana shoye ashishe Israel (osheshi omunhu keshe oku shii oudjuu noupyakadi waye), ngeenge va yelula omake ve a yukifa keumbo eli, 30 alikana, va uda okudja meulu, monhele yoye yokukala, noku va dimina po. Keshe umwe mu pa ondjabi she likolelela keendjila daye adishe, osheshi ou shii omutima waye (oove auke u shii filufilu osho shi li momutima womunhu), 31 opo va kale have ku tila mokweenda meendjila doye okukalamwenyo kwavo akushe medu olo wa li wa pa ootatekulululwa.

32 “Natango, shi na sha nomunailongo, oo ehe fi womoshiwana shoye Israel, oo a dja kedu lokokule omolwedina loye linene,* eke loye li na eenghono nokwooko kwoye kwa yeluka, ndele te uya, nokwiilikana a taalela keumbo eli, 33 alikana, mu uda okudja meulu, monhele yoye yokukala, nokuninga ashishe osho omunailongo te ku pula, opo ovanhu aveshe kombada yedu va shiive edina loye nova kale have ku tila, ngaashi oshiwana shoye Israel hashi ningi, nova shiive kutya, eumbo eli nda tunga ola lukilwa edina loye.

34 “Ngeenge oshiwana shoye osha i koita shi ka lwife ovatondi vasho, ngaashi we shi tuma, ndele tashi ilikana kwoove, sha taalela koshilando osho wa hoolola nokeumbo eli nda tungila edina loye, 35 shi uda okudja meulu, eshi tashi ku ilikana noku ku pula ekwafo, ndele to shi yambidida.

36 “Ngeenge ova nyono kwoove (osheshi kape na omunhu iha nyono), ndele to va handukile noku va efela momake omutondi wavo, ndele omutondi wavo te va kwata po, noku va twala moukwatwa kedu lavo, kutya nee okokule, ile opopepi, 37 ndele tave lialuluka ve li kedu oko va twalwa ve li eenghwate, tava alukile kwoove noku ku indila ekwafo ve li kedu oko va twalwa ve li eenghwate, tava ti, ‘Otwa nyona, twa ninga epuko, notwa katuka shihe li pandunge,’ 38 nova alukile kwoove nomutima wavo aushe nomwenyo* wavo aushe medu lovatondi vavo, ovo ve va twala moukwatwa, ndele tava ilikana kwoove va taalela kedu lavo, olo wa li wa pa ooxekulululwa, nokoshilando osho wa hoolola nosho yo keumbo olo nda tungila edina loye, 39 va uda okudja meulu, monhele yoye yokukala, eshi tava ilikana kwoove noku ku pula u va file onghenda, ndele to va yambidida, nokudimina po oshiwana shoye osho sha nyona kwoove.

40 “Kalunga kange, alikana, omesho oye naa pashuke nomatwi oye naa pwilikine nelitulemo keilikano, olo tali ilikanenwa monhele ei. 41 Ndele paife, alikana, Jehova Kalunga, inda monhele yoye yetulumuko, ove nOshikefa sheenghono doye. Ovapristeri voye, Jehova Kalunga, nava djale exupifo, novadiinini voye nava hafele ouwa woye. 42 Jehova Kalunga, ino efa* omuvaekwa woye. Dimbuluka ohole i na oudiinini, oyo wa ulikila omupiya woye, David.”