Esra
6 Ohamba Darius oya yandja elombwelo, nova ninga omakonakono meemhungulilo,* omo mwa li mwa tuvikilwa omamona omuBabilon. 2 Opo nee okwa monika omushangwatonywa moilando ya dingililwa komakuma muEkbatana, oshitukulwalongo shaMedia, nomwa shangwa etumwalaka tali landula:
3 “Momudo wotete wepangelo lohamba Kores, ohamba oya yandja elombwelo li na sha notembeli yaKalunga muJerusalem tali ti: ‘Otembeli nai tungululwe i li onhele yokuyambela omayambo, nomakanghameno ayo naa dikwe peenhele dao, oule wayo wopombada omaludimbo 60,* nounene wayo omaludimbo 60. 4 Ekuma lalo oli na okutungwa li na omikweyo nhatu domamanya manene e li peenhele dao, nomukweyo umwe woipilangi, noitungifo oi na okulandwa okudja momamona omeumbo lohamba. 5 Natango, oikwatelwa yoshingoli noyoshisilveri yomotembeli yaKalunga, oyo Nebukadnesar a kufa motembeli, oyo ya li muJerusalem, noya etwa kuBabilon, nai shunifwe, opo i ka kale motembeli yaKalunga muJerusalem nokutulwa peenhele dayo motembeli.’
6 “Onghee hano, Tattenai, ngoloneya woshitukulwa shoKombada yOmulonga,* Setar-bosenai nosho yo vakweni, oongoloneya, ovo ve na eendodo dopedu voshitukulwa shoKombada yOmulonga, kaleni kokule noilonga oyo. 7 Inamu ya nande moshipala oilonga yotembeli yaKalunga. Ngoloneya wOvajuda novakulunhu vOvajuda otava ka tungulula otembeli yaKalunga ponhele opo ya li nale. 8 Shikwao vali, ohandi yandje oshipango shi na sha naasho mu na okuningila ovakulunhu ava vOvajuda, eshi tava tungulula otembeli yaKalunga: Ove na okupewa eefuto tadi di momamona omouhamba, moifendela oyo hai di koshitukulwa shoKombada yOmulonga, opo oilonga yavo iha katashwe. 9 Keshe osho sha pumbiwa, osho tashi pulwa kovapristeri ovo ve li muJerusalem, ngaashi eendumetana, eedi deendume, eedjona deendume, odo di na okuyambelwa Kalunga komeulu di li omaxwikiloyambo, oilya yo-wheat, omongwa, omaviinyu, omaadi, nave i pewe pandjikilile efiku nefiku nopehe na okufaula, 10 opo va twikile okuyambela Kalunga komeulu omayambo, oo ta hokwa, nokwiilikanena omwenyo wohamba novanamati vayo. 11 Onda yandja yo elombwelo kutya, ngeenge ope na oo ta tauluka oshipango eshi, opala nai kufwe meumbo laye, nokuyukililifwa, ndele ta mangelwa ko,* neumbo laye nali ninge oshala shoimbodi omolwenyono olo. 12 Kalunga, oo a ningifa edina laye li kale mo, na hanaune po ohamba, ile omunhu keshe, oo ta kendabala okutauluka elombwelo olo nokuhanauna po otembeli yaKalunga, oyo i li muJerusalem. Ame Darius, onda yandja elombwelo olo. Nali wanifwe po diva.”
13 Opo nee Tattenai, ngoloneya woshitukulwa shoKombada yOmulonga, Setar-bosenai navakwao, ova wanifa po diva ashishe osho ohamba Darius ya popya. 14 Ovakulunhu vovaJuda ova twikila okutunga nokuninga exumokomesho, va tuwa omukumo kwaasho sha xunganekwa komuprofeti Haggai naSakaria, omutekulu waIddo. Ova mana okutunga palombwelo laKalunga kaIsrael, lohamba Kores, Darius naArtasasta, ohamba yaPersia. 15 Ova mana okutunga otembeli momwedi omutitatu, Adar,* momwedi omutihamano wepangelo lohamba Darius.
16 Opo nee Ovaisrael, ovapristeri, Ovalevi novanhu aveshe, ovo va dja moukwatwa, ova yapula otembeli yaKalunga nehafo. 17 Omolweyapulo lotembeli yaKalunga, ova yandja eengobe deemhedi 100, eedi deendume 200, eedjona deendume 400, noikombo 12 i li etimbayambo lOvaisrael aveshe, she likolelela komuvalu womapata aIsrael. 18 Ova nangeka po ovapristeri nOvalevi paengudu davo moilonga yaKalunga muJerusalem, she likolelela kwaasho sha shangwa membo laMoses.
19 Ovanhu, ovo va dja moukwatwa, ova dana Opaasa mefiku eti-14 lomwedi wotete. 20 Ovapristeri nOvalevi aveshe koonono ove liyelifa, nova yela filufilu; ova dipaa eyambo lOpaasa omolwaaveshe ovo va li moukwatwa, ovapristeri vakwao, navo vene. 21 NOvaisrael aveshe, ovo va dja moukwatwa, ove li lya pamwe nakeshe umwe oo e va waimina nokwa efa po oinima inai koshoka yoiwana a longele* Jehova, Kalunga kaIsrael. 22 Ova li yo va dana nehafo Oshivilo shOmingome inadi ya Efulika oule womafiku aheyali, na Jehova okwa li e va hafifa nokwa ningifa ohamba yaAsiria i kale ye va hokwa momutima wayo, noye va yambidida* moilonga yotembeli yaKalunga kashili, Kalunga kaIsrael.