Esra
9 Diva konima eshi oinima oyo ya ningwa, omalenga okwe uya kwaame, ndele taa ti: “Ovaisrael, ovapristeri nOvalevi, inave liyoolola ko koiwana noinava efa po okulonga oilonga yavo ii. Oiwana yOvakaanan, Ovaheti, Ovaperesi, Ovajebusi, Ovaammoni, Ovamoab, Ovaegipiti nOvaamori. 2 Ove likufila ovanakadona vavo, va ninge ovakulukadi vavo novovanamati vavo. Paife oludalo liyapuki otali endafana novanhu vomoiwana. Omalenga novapangeli, ovo ve na eendodo dopedu, ovo kamana mokukala vehe fi ovadiinini moshinima eshi.”
3 Diva eshi nda uda kombinga yaasho, onda pombaula oshikutu shange nokandjafa kange kehe na omaoko, nde liduda eexwiki komutwe nosho yo eendjedi, nokukala omutumba nda kumwa. 4 Opo nee keshe oo a fimaneka* eendjovo daKalunga kaIsrael okwa ongala pwaame omolwokuhe na oudiinini kwovanhu, ovo va li moukwatwa, ofimbo nda li omutumba nda kumwa, fiyo okonguloshi, eshi taku yandjwa eendjayambo.
5 Pefimbo opo konguloshi, fimbo kwa li taku yandjwa eendjayambo, onda fikama nda fya ohoni, nda djala oshikutu nokandjafa kange kehe na omaoko ka pombauka, nonda twa eengolo nokuyelula omaoko ange pombada kuJehova, Kalunga kange. 6 Onda ti: “Kalunga kange, onda fya ohoni, noitandi dulu okuyelula oshipala shange kwoove Kalunga kange, osheshi omatimba etu okwa hapupala neenghono, nomatauluko etu okwa twa keulu. 7 Okudja komafimbo ootatekulululwa fiyo okefiku eli, omatauluko etu okwa kala mahapu, nomolwomanyono etu, fye, eehamba detu novapristeri vetu, otwa li twa yandjwa momake eehamba doiwana tu dipawe neongamukonda, tu twalwe moukwatwa, tu nyekwe oinima yetu nokufifwa ohoni, ngaashi shi li kunena. 8 Ndele paife, oule wokafimbo, Jehova, Kalunga ketu, okwa ulika kutya okwe tu hokwa, eshi a efa oshixupe shi ye, nokwe tu pa onhele ya amenwa* monhele yaye iyapuki, Kalunga ketu e tu hafife, nokwe tu pa emanguluko linini moupika wetu. 9 Nonande otu li ovapika, Kalunga ketu ine tu efa, eshi twa kala moupika, ndele okwe tu ulikila ohole i na oudiinini moipafi yeehamba daPersia, opo e tu mangulule, tu ka tungulule oikulukuma yotembeli yaye, nokwe tu amena* muJuda nomuJerusalem.
10 “Ndele paife otu tye vali shike, Kalunga ketu, konima yoinima ei? Osheshi otwa efa po oipango yoye, 11 oyo we tu pa okupitila movapiya voye ovaprofeti, wa ti: ‘Edu olo tamu ka fyuulula inali koshoka omolwovanhu vomoiwana inava koshoka, ovo ve li mo, omolwoilonga yavo itondifa; ova yadifa edu olo noinima oyo Kalunga a tala ko inai koshoka. 12 Onghee hano, inamu yandja ovanakadona veni kovanamati vavo, noinamu efa ovanamati veni va hombole ovanakadona vavo; inamu va yambidida va kale nombili nova hepuluke, opo mu kale mwa pama, nokulya oinima iwa yomedu olo, ndele tamu li fyuulula po li ninge lovanamati veni fiyo alushe.’ 13 Konima eshi oinima aishe oyo ye tu ningilwa omolwoilonga yetu ii nomolwomatauluko etu mahapu, ove Kalunga ketu, ino ungaunga nafye she likolelela komanyono etu, ndele owa efa ava tu li apa tu dje mo moukwatwa . . . 14 mbela otu na vali okunyona oipango yoye, nokuninga eudafanotwokumwe tu hombolafane novanhu ovo hava longo oilonga oyo itondifa? Mbela ito ka kala we tu handukila neenghono noku tu hanauna po filufilu, noito fiye po nokuli noshixupe? 15 Ove Jehova, Kalunga kaIsrael, oumuyuki, osheshi otwa xupa tu li oshixupe fiyo okefiku eli. Otu li apa koshipala shoye, tu udite ondjo, osheshi itatu dulu okufikama koshipala shoye, omolwoshinima eshi.”