Hosea
2 “Tya kovamwaxo, ‘Oshiwana shange!’*
Nokovamwanyokokadona, ‘Akutu, omukainhu oo a filwa onghenda!’*
2 Lundila nyoko; mu lundila,
Osheshi ye ke fi omukulukadi wange, naame nghi fi omushamane waye.
Oku na okweefa po oumbwada* waye
Nokukufa po oluhaelo pokati komavele aye,
3 Ngeenge hasho, ohandi ke mu dula, a kale hamunghele, noku mu ninga a kale ngaashi mefiku olo a dalwa,
Handi mu ningi ngaashi ombuwa,
Handi mu ningi edu lihe na omeva,
Noku mu ningifa a fye kenota.
4 Noitandi ka fila onghenda ovanamati vaye,
Osheshi vo ovanamati vombwada.*
5 Osheshi ina yavo okwa ya moumbwada.*
Oo e va dala okwa katuka monghedi ififohoni, osheshi okwa ti,
‘Ohandi ka shikula ovaholike vange,
Ovo hava pe nge omungome wange nomeva ange,
Olududi lange leedi noliina yange, omaadi ange nokunwa kwange.’
6 Onghee ohandi ka fitika ondjila yoye nongubu yomakiya;
Nohandi ke mu tulila po ekuma lomamanya,
Opo aha dule okumona eendjila daye.
7 Ota ka shikula ovaholike vaye, ashike ite ke va hanga;
Ote ke va konga, ndele ite ke va mona.
Opo nee ota ka tya, ‘Ohandi shuna komushamane wange wotete,
Osheshi onda li ndi li nawa pefimbo olo shi dulife paife.’
8 Ka li a didilika kutya aame nda li nde mu pa oilya, omaviinyu mape nosho yo omaadi,
Naame yo nde mu pa oshisilveri shaye shihapu unene
Noshingoli, osho va longifa mokulongela Baal.
9 ‘Onghee hano, ohandi ka aluka, ndele handi kufa po oilya yange pefimbo layo,
Nomaviinyu ange mape pefimbo lao,
Nohandi ka vakula po olududi lange leedi noliina yange, oyo ya li i na okuuvika epenge laye.
10 Paife ohandi ka holola oilyo yaye yopaumwene moipafi yovaholike vaye,
Nokape na omunhu te ke mu xupifa mo meke lange.
11 Ohandi ka xulifa po ehafo laye alishe,
Oivilo yaye, eemwedi daye dipe, omashabata aye nomafimbo aye aeshe oivilo.
12 Nohandi ka nyonauna omindjebele daye nomikwiyu daye, odo a popya a ti:
“Ei oyo ondjabi yange, oyo ovaholike vange va pa nge”;
Ohandi ke di lundululila mofuka,
Noifitukuti yomoixwa otai ke di xwaka po.
13 Ohandi ke mu hokololifa omolwomafiku oo a yambela oihongwafano yaBaal omayambo,
Eshi a li he liwapeke neelinga daye nosho yo noinima yokufeweka, nokushikula ovaholike vaye,
Ndele okwa li a dimbwa nge,’ Jehova osho ta ti.
15 Ohandi ke mu shunifila oikunino yaye yomandjebele okudja pefimbo olo okuyuka komesho,
NEfilu laAkor li li oshivelo sha finda keteelelo;
Ota ka nyamukulila oko ngaashi pomafiku ounyasha waye,
Ngaashi mefiku olo, eshi a dja medu laEgipiti.
16 Nomefiku olo,’ Jehova osho ta ti,
‘Oto ka ifana nge Omushamane wange, noito ka ifana nge vali Omwene wange.’*
17 ‘Ohandi ka kufa mo omadina oihongwafano yaBaal mokanya kaye,
Noitai ka dimbulukiwa vali komadina ayo.
18 Mefiku olo ohandi ke va ningila ehangano noifitukuti yomofuka,
Nosho yo needila dokeulu noinima aishe oyo tai linyenge kombada yedu;
Ohandi ka xulifa po moshilongo outa, eongamukonda nosho yo oita,
Nohandi ke va ningifa va nangale* meameno.
19 Ohandi ke ku valeka ame mwene fiyo alushe;
Nohandi ke ku valeka ame mwene mouyuki nomwaasho sha yuka,
Mohole i na oudiinini nomonghenda.
20 Ohandi ke ku valeka ame mwene moudiinini,
Noto ka shiiva filufilu Jehova.’
21 ‘Mefiku olo, ohandi ka nyamukula,’ Jehova osho ta ti,
‘Ohandi ka nyamukula eulu,
Notali ka nyamukula edu;
22 Nedu otali ka nyamukula oilya nosho yo omaviinyu mape nomaadi;
Notai ka nyamukula Jisreel.*
23 Ohandi ke mu kuna ngaashi ombuto yange mwene medu,
Nohandi ke mu fila onghenda, oo ina filwa onghenda;*
Nohandi ka tya kwaavo vehe fi oshiwana shange:* “Nye oshiwana shange,”
Notava ka tya: “Oove Kalunga kange.”’”