Butivar, i Biblia sicavel că le manușa loialo le Iehovasche sas-le zurale. Tha chiar vi le mai zurale mașcar lende simțosarde-pe poiechdata covle. Sar exemplo, le reges David, sas-les ghiesa cana simțosardea-pe „zuralo sar iech plain”, tha ande aver ghiesa ‘sas-lo astardo catar iech bari dar’. (Ps. 30:7) Iech aver manuș anda savo del-pe duma andi Biblia si o Samson, saves sas-les iech baro zuralimos cana o spirito sfânto cherelas buchi opral leste. Vo jianelas că bi cadale zuralimasco cai avelas le Devlestar, ‘avileas te avel covlo hai te avel sar sea le cover manușa’. (Jud. 14:5, 6; 16:17) Cadal murșa pherde pachiamos sas-le zurale numai anda codoia că o Iehova dea-len zuralimos. O apostolo Pavel jianelas că vi les sas-les nevoia catar o zuralimos cai avelas le Iehovastar. (2 Cor. 12:9, 10) Le Pavelos sas-les nasfalimata. (Gal. 4:13, 14) Poiechdata, sas pharo anda leste te cherel so jianelas că si mișto. (Rom. 7:18, 19) Aver data, vo sas-lo darado hai ci jianelas so daștilas te întâmplol-pe lesa. (2 Cor. 1:8, 9) Cu sea cadala, cana sas-lo covlo, vo cărdiolas zuralo. Sar? O Iehova delas-les o zuralimos cai trebulas lesche. Vo cărdea le Pavelos zuralo. w23.10 12 ¶1, 2

Dacă o gândo că ci sam lașe chancesche peravel amen, te na bâstras că o Iehova țârdea amen peste. (Ioan 6:44) Vo dichel amende șucar buchia cai amen daștil-pe că ci dichas-len. Sa cadea, vo prinjianel mai mișto amaro ilo sar amen. (2 Cron. 6:30) Cadea că, te pachias-les ciaces cana phenel că sam cuci ande lesche iacha. (1 Ioan 3:19, 20) Angla te prinjianas o ciacimos, chichiva mașcar amende cărdeam buchia nasul anda save doșaras amen vi acana. (1 Pet. 4:3) Hai aver creștini zurale ando pachiamos maren-pe vi acana contra lenghe covlimata. Tha so daștis te phenes anda tute? Pachias poiechdata că o Iehova ci daștil te iertil tut? Dacă da, va zuriarela tut o exemplo chichiva manușengo loialo le Iehovasche cai nachle vi von prin cadaia. Iech anda lende sas o apostolo Pavel. Vo sas-lo zurales perado catar pesche covlimata. (Rom. 7:24) Chiar cana falea-les pharo anda le păcatea cai cărdea-len hai boldea-pe, o Pavel phendea anda peste că sas „o mai țâno mașcar le apostoli” hai „o dintuno” mașcar le păcătoși. (1 Cor. 15:9; 1 Tim. 1:15) w24.03 27 ¶5, 6

Anda le buchia nasul cai cărdea-le o rege Ioas, sichioas că si zurales importanto te alosaras amenghe amala cai iubin le Iehovas hai camen te bucurin lesco ilo. Cadala amala va ajutin amen te cheras lașe buchia. Na bâstăr că daștis te cărdios amal codolența cai sile mai phure sau mai tărne tutar. Sar exemplo, o Ioas sas-lo but mai tărno sar pesco amal, o Iehoiada. Vi tu daștis te pușes tut anda le amala cai alosares-len tuche: „Ajutin man te bariarav mânro pachiamos ando Iehova? Zuriaren man te așunav le Devlestar? Ciaiol-len te den duma anda o Iehova hai anda le cuci ciacimata cai sicavel-len i Biblia? Sicaven pachiv caring so phenel o Del? Phenen manghe numai so camav te așunav sau silen tromai te ortosaren man cana greșisarav?”. (Prov. 27:5, 6, 17) O ciacimos si, că dacă che amala ci iubin le Iehovas, ci si tut nevoia lendar. Tha, dacă von iubin le Iehovas, na de-len drom; von va ajutina tut te cheres so si mișto. (Prov. 13:20) w23.09 9 ¶6, 7